Arnolt Ditj
Arnolt Ditj (* 19. Januar 1889 in Hochfeld, Jasykowo-Kolonie; † 10. Juli 1970 in Dorloten) weer en plautdietschen Schriever. Ditj weer een vun de eersten, de anfungen hebbt, op Plautdietsch to schrieven.
Ditj is in Hochfeld boren, in ene Kolonien vun de Russlandmennoniten in de Ukraine. He güng in Jekaterinoslaw op de Kommerzschool un denn 1909/1910 na Düütschland, Kunst to studeren. As he trüchkeem, müss he sien Forsteideenst afleisten un hett denn in St. Petersborg wedder Kunst studeert. In’n Eersten Weltkrieg hett he bi’t Rode Krüüz in’t Kontoor arbeidt. Na’n Krieg keem he trüch na Jasykowo un hett in Nikolaipol Kunst-Ünnerricht geven.
1923 is Ditj mit siene Familie na Kanada gahn un hett in Steinbach leevt. Dor hett he 1924 dat düütsche Wekenblatt Steinbach Post övernahmen un weer nu Rutgever un Schriever. Vun 1935 bet 1938 hett he ok dat Literatur- un Kulturmagazin Mennonitische Volkswarte rutgeven, dat eenmal in’n Maand rutkeem. Dat harr aver nich noog Lesers un so keem 1938 dat finanzielle Ut för dat Blatt. He hett 1938 siene Familie na Düütschland schickt, kunn aver denn nich mehr nakamen, as de Krieg anfüng. He hett sien Wekenblatt verköfft un verleed sik nu ganz op’t Schrieven. He schreev 1942/1943 den eersten Deel vun Koop enn Bua un hett vun 1944 bet 1948 sien autobiograafschen Roman Verloren in der Steppe in fief Delen rutgeven. Ok en ganze Reeg annere Böker op Plautdietsch un över Plautdietsch hett he in disse Tiet noch schreven. De letzten Johren vun sien Leven hett he bi siene Dochter in Dorloten leevt.
Vun 1985 af an is ene Warkutgaav vun all sien Warken in veer Bänn rutkamen.
Warken
ännern- Koop enn Bua opp Reise. 1943
- Verloren in der Steppe. fief Bänn, 1944-1948
- Koop enn Bua faore no Toronto. 1948
- Dee Fria. 1948
- Dee Millionäa von Kosefeld. 1949
- Wellkaom oppe Forstei. 1950
- De Opnaom. 1951
- Onse Lied. 1952
- Koop enn Bua enn Dietschlaund. 1960
Kiek ook bi
ännernWeblenken
ännern- Arnolt Ditj in de Datenbank Die niederdeutsche Literatur (hoogdüütsch)