Arteria vertebralis
De Arteria vetrebralis oder ok Warvelarterie is en Bloodfatt, dat vun de Arteria subclavia aftwiegen deit un to de Arterien höört, de den Bregen mit Blood versorgt.
Verloop un Aftwiegen ännern
Se entsteiht in de Bosthöhl un tütt denn na’n sössten Halswarvel, vun wo ut se dör en Lock in’n Sietenfoortsatz vun de Halswarvels (Foramen transversarium) in Richt op’n Schädel to löpt. De Keed vun Foramina transversaria warrt ok tohopenfaten as Dweerfoortsatzkanal betekent.
Vun de Arteria vertebralis gaht an elk Halswarvel Aftwiegen in de Muskulatur ümher as ok in den Warvelkanal to’n Versorgen vun’t Rüchmark in’n Halsafsnitt. An’n Atlas löpt se dör sien Foramen transversarium in de Fossa atlantis un vun dor ut wieter över dat Foramen alare (Bi Roofdeerten Incisura alaris) na’t Foramen vertebrale laterale vun dissen Warvel. De Ennen vun de beiden Warvelarterien op de linken un de rechten Siet verbinnt sik ventral vun de Medulla oblongata to de Arteria basilaris, wat en unpoor Bloodfatt is – d. h. de A. basilaris gifft dat in’n Lief blots eenmol.
De Basilaris is en Toloop to’n Circulus arteriosus cerebri, also een vun de Bloodfatten, de den Bregen mit Blood versorgt. Bevör sik de beiden Vertebralis-Ennen tosamensluut, geiht en lütten Twieg af, de den Bregenstamm un Delen vun’n Lüttbregen versorgt. Dat is de Arteria cerebelli inferior posterior (PICA). Ut de kranialen Ennen kummt ok de Arteria spinalis anterior („vördere Rüchmarksarterie“) tostannen. De Toloop is an disse Steed bannig wesselhaft un kann teemlich ünnerscheedlich wesen.
Bi Wedderkauers höört de Arteria vertebralis al op Hööch vun den Axis op. Se hebbt dorüm ok keen Foramen transversarium an’n Atlas.