Arthur Richard Franklin Dickson
Arthur Richard Franklin Dickson (* 13. Januar 1913 in Lucea, Jamaika; † 21. Mai 2011 in Lindfield, England) weer en Commonwealth-Jurist ut Jamaika.
Dickson is 1913 as jüngst von acht Kinner in Lucea (Jamaika) boren.[1][2] He güng dor op de Rusea’s School un dat Cornwall College.[1] Na de School is he na England gahn, üm Juristeree to studeren. 1938 is he as Avkaat beropen worrn un weer denn Maat von Lincoln’s Inn.[1] He güng trügg na Jamaika un hett dor as Avkaat in Saint James Parish un Trelawny Parish arbeidt.[1] 1944 bet 1947 hett he en Posten as Magistraat op de Turks- un Caicos-Eilannen annahmen, dor de Gesetten to överarbeiden.[1]
Na tosätzliche Statschonen in Barbados (1947–1949) un as Magistraat in Brietsch-Guyana (1949–1952) is he 1952 as Registrar na Nigeria an’n High Court gahn un is dor 1958 Richter worrn un bet 1962 bleven.[1][3] Von 1964 bet 1967 weer he Richter in Noord-Rhodesien.[1] Von dor is he na Uganda an’n High Court wesselt un weer dor 1967 bet 1971 Richter.[1][3] 1971 hett he sik in England dallaten un weer för en poor Maand Richter för de Middlesex Quarter Sessions, weer aver gliektiedig ok Richter op de Leeward Islands.[1][3]
1973 is he Chief Justice von Belize worrn, wat he bet 1974 bleven is.[1] Aver ok na düsse Tied is he as Commissioner for Law Revision in Belize aktiv bleven. Von 1973 bet 1976 weer he deelwies tosätzlich as Richter an’t Böverst Gericht von Anguilla aktiv.[3] Von 1972 bet 1985 hett he en Deel von de Tied as Richter an dat Industrial Tribunal in England un Wales arbeidt.[3]
Dickson hett 1949 in siene Tied op Barbados Joanna Maria Margaretha van Baardwyk († 1998) freet.[1][2] De beiden harrn veer Söhns.[2] Dickson hett toletzt in Lindfield leevt un is dor an’n 21. Mai 2011 doodbleven. Na en Gräffnis an’n 3. Juni is he op’n Walstead Cemetery in Lindfield begraven worrn.[4]
Ehren ännern
To Königin Elisabeth II. ehren Geboortsdag 1974 is he Commander of the Order of the British Empire worrn.