Banjul

Banjul (vörmols Bathurst) is de Hööftstadt vun’t westafrikaansche Land Gambia un is 1816 grünnt worrn. As „City of Banjul“ höört de Stadt in de Verwaltungsindelen vun Gambia, blangen de Regionen un de Kanifing-Gemeen as egen Verwaltungsbezirk to de böversten Even vun de Verwaltungseenheiten.

Dat Stadtrebeet ümfaat en Flach vun ruchweg 12 km² un is de föfftgröttste Stadt vun den Staat Gambia. Na en Bereken leevt in de Stadt 32.921 Inwahners (Stand: 2010). De letzte offizielle Volkstellen weer in’n Johr 2003 un keem op 34.828 Inwahners^[1].

Geografie un Klima

Klimadiagramm för Banjul

Banjul liggt an de Münnen vun’n Gambia-Stroom an de Küst vun Atlantischen Ozean. De Oort is op en flach Sandbank-Eiland (St. Mary’s Island) anleggt worrn, de sik in’n Verloop vun de Tiet in de Münnen aflagert hett. As dor noch nümms wahnen de, hebbt op de Sandbank Baobabs un Bambuswoolden wassen. Dat Woort Banjul kummt vun de Mande-Spraak un bedüüt so veel as „Bambuseiland“.

Stadtrebeet

Dör de Laag op de Sandbank kann de Stadt sik nich wieter utbreden. An de westlichen Stadtgrenz leegt Magrovensümp, de ünner den Naam Tanbi Wetland Complex bekannt sünd un as Naturreservat sünners schuult sünd.

De nächste gröttere Stadt is Serekunda, de vun de natürlichen Inschränken vun Banjul profiteeren deit un gau wasst. Över den Banjul-Serekunda Highway is se mit Banjul verbunnen un liggt in’n Westen vun de Magrovensümp op’t Fastland-

Balngen de Hööftstadt is Banjul ok en egenen Verwaltungsbezirk vun’n Staat. Tosamen mit de Kanifing-Gemeen billt de Bezirk de Greater Banjul Area.

Inwahners

Entwickeln vun de Inwahnertall
Johr	1963	1973	1983	1993	2003	2005	2007	2009	2010
Inwahners	27.809	39.476	44.188	42.326	34.828	34.589	34.125	33.422	32.921

Na de dormolige Volkstellen vun 1993^[2] stellt de Mandinka mit ruchweg 30 % den gröttsten Andeel an de Inwahners vun Banjul, folgt vun de Fula un de Wolof. Nipp un nau verdeel sik de Tohörigkeit op de folgen Volksgruppen: 28,9 % Mandinka, 9,8 % Fula, 31,1 % Wolof, 6,4 % Jola, 5,1 % Serahule, 8,1 % Serer, 5,9 % Aku, 1,1 % Manjago, 1,4 % Bambara un 2,1 % annere Ethnien

Historie

De Arch 22 in Gambia is to’n Andenken an den Militärputsch vun’n 22. Juli 1994 opstellt worrn

De Stadt Banjul is in’t Johr 1816 ünner den Naam Bathurst as Militär- un Hannelsposten grünnt worrn, as de Briten versöcht hebbt, den Hannel mit Slaven intodämmen. De Naam weer afleidt vun Henry Bathurst, den Sekretär vun’t Britische Kolonialbüro. Op de annern Siet vun’n Gambia-Stroom gegenöver vun Fort Bullen (Barra) hebbt se en Fort inricht mit mehrere Geschütt-Anlagen, ünner annern de Six-Gun Battery. Beide Forts weern dorto dacht, Den wieteren Weg vun’n Slavenhannel ut dat Achterland to hinnern. De Six-Gun Battery is siet 2003 as UNESCO-Weltkulturarv inordent.

An’n 18. Feruar 1965 is se de Hööftstadt vun den ne’en unafhangigen Staat Republic of The Gambia worrn. Ehrn hüütigen Naam Banjul kreeg se an’n 24. April 1973 in’n Rahmen vun de Afrikaniseeren.

Religion

De König-Fahad-Moschee in Banjul

De rööm-kathoolsche Kark hett för de ruchweg 33.000 Katholiken in’t Land dat Bisdom Banjul inricht.

Politik

D Vörsitter vun den Stadtraat (Banjul City Council) is den Titel na en Lord Mayor. Siet den 12. Februar 2008 warrt dit Amt vun Samba Faal bekleedt.

Städerpartnerschoppen

Grimsby, Vereenigt Königriek
Newark, USA
Taipeh, Republiek China
Tuskegee, USA
Unna, Düütschland (ahn förmliche Grundlaag)
Dakar, Senegal
Mailand, Italien (2008)^[3]

Kultur

Dat National Museum op de Gloucester Street wiest Utstellungsstücken ut de verleden Kolonialtiet un ut de jüngeren Historie vun Gambia.
En ungewöhnlich Autorennen, de Plymouth-Banjul Challenge, ennt in Banjul. Deelnehmers mööt dorbi en Auto fohren, dat keen grötteren Weert as ruchweg 100 britische Pund hebben dröff, un mööt ok ünnerwegens mit en lütt Budget henkamen. Anlehnt an de Rallye Paris-Dakar schüllt de Autos vun’t süüdengelsche Plymouth in knapp twintig Daag an de Noordwestküst vun Afrika ankamen. Wenn se ankamt, warrt se spennt oder in’n go’en Sinn verköfft.
Tweemol in’t Johr finnt butendem ok de Dresden-Dakar-Banjul Challenge statt, de an de baven nöömte Challenge anlehnt is. Utrichter is de säss’sche Breitengrad e.V.. Start is eenmol in’n März un eenmol in’n Oktober. Dorbi warrt bruukte Autos fohrt, de an’t Teel för’n go’en Sinn veraukschoneert warrt.

Weertschop un Verkehr

En grote Rull för Gambia speelt de Seehaven vun Banjul. Exporteert warrt vör allen Eerdnööt, Importgöder sünd vör allen Eerdööl un Eerdöölprodukten.

Vun’n Westen her is de Stadt vun’t Fastland ut över den goot utboeten Banjul-Serekunda Highway anbunnen, de över de Denton Bridge föhrt. Na Oosten hen gifft dat de Fähr Banjul-Barra, de all negentig Minuuten na Barra op de annern Siet vun’n Stroom afleggt.

Buten vun Banjul, ruchweg 24 km wiet weg, liggt de Banjul International Airport.