Bannock
De Bannock sünd en Indianer-Stamm ut de Shoshone-Twieg vun de uto-azteksch Spraakfamilie. Se snackt den sülvigen Dialekt as de Paviotso, vun de se sück afspalt hebbt.
De Bannock levten mit hör Ünnerstämme, de Yambadika, Waradika, Penointikara, un Kutshundika, in dat Rebeet vun de hüdige US-Bundsstaat Idaho, aber ok in West-Wyoming, Oost-Montana un in dat ööstlich Oregon. Dat sülvige Rebeet wurr aber ok vun de Nöördliche Shoshone bewahnt, de kulturell meest gliek weern. Dör de starke Verbindung vun de beid Völker hett sück ok en meest glieker Historie entwickelt.
De Kultur vun de Bannock weer meest so as de Plainskulturen. Saisonale Wannerungen in’ Sömmer gungen nah Westen to de Shoshonefälle, um Lachs to fangen, lütt Wilddeerten to jagen un Beeren to sammeln, un in’ Harvst nah Noordoosten in dat Yellowstonerebeet in Wyoming un Montana to de Büffeljagd. De Jagd up Büffel broch mit sück, dat se good mit de Shoshone tosommenarbeiden mussen, mit de se in de gefürchteten Blackfoot en gemeensam Feind deelen deen, de de Büffeljagdgründe in Montana kontrolleeren de.
Vör 1853 minneseer en Pocken-Epidemie de Bannock. 1867 wurrn se vun de US-amerikansch Armee slahn un 1869 in de Fort-Hall-Reservatschoon in Idaho umsiedelt. Weil dor aber vööl Lüüd storven sünd, sünd se bald weer in de Rocky Mountains trucken. De Bannock weer kein grooden Stamm, wahrschienlich harrn se nie mehr as 2.000 Stammesliddmaten, aber se harrn temelk Infloot up hör freedvulleren Nahberstämme, de se to Upstännen un Överfälle tegen de Witten upstachelt hemmen. Hunger, Frustratschoon över dat Verschwinden vun de Büffel un de unsensible Reservatschonspolitik vun de U.S. Regierung hebbt denn to den Bannock-Krieg 1878 föhrt, de mit en Massaker an 140 Bannock-Mannlüüd, -Fruen un –Kinner bi Charles Ford in Wyoming beend wurr.
De eegenstännig Kultur vun de Bannock hett de Inschränkungen dör dat Reservatschonsleven nich överstahn. Um 1900 geev dat man blots noch ruch weg 500 Bannock vun de aber völ mit Shoshone verheiraadt weern. Hüüd leven de Bannock weer tosommen mit de Nöördlich Shoshone in de Fort-Hall-Reservatschoon. Vun de ca. 6.0000 Bannock kunnen 1999 noch 1.631 hör Spraak.
Kiek ok
ännernLiteratur
ännern- John R. Swanton: The Indian Tribes of North America. Smithsonian Institution, Bureau of American Ethnology, Bulletin 145, Smithsonian Press, Washington D.C., 1969, ISBN 0-87474-092-4
- D'Azevedo, Warren L.: Handbook of North American Indians. Volume 11: Great Basin. Smithsonian Institution (Hg.), Washington, 1986, ISBN 0-16-004581-9
Weblenken
ännern
- Websteed vun de Shoshone-Bannock-Stämme (engelsch)
- Nöördliche Shoshone un Bannock (engelsch)