Bardörp 85

Bardörp 85 is en Footballvereen ut den Bezirk Bardörp in Hamborg. Siet 2009 speelt de Trupp in de Böverliga Hamborg (5. Liga). Bit 2009 weren de Footballers inmengeleert in den ASV Bardörp 85, en Sportvereen, de sien Wutteln in'n Johr 1885 hett un wo dat ok anner Sportoorden geven deit. Man de Footballers hebbt en egen Vereen op de Been stellt, den FC Bardörp 85. Liekers seggt de Lüüd jümmers "Bardörp 85" or ok bloots "85". De Ökelnaam is "Elstern" (op Platt "Heistern") wieldat se jümmers in swatt-witt spelen doot. De mojste Speeltied harr Bardörp 85 in 1958. Toeerst sünd se in de Fooball-Böverliga Noord opstiegen (in düsse Tied weer dat de höögste Liga in Düütschland). Achteran stunn se in'n Finale vun de Düütsche Amatöörmeesterschap.

Geschicht

Grünnen

Dat fung allens an mit den "Allgemeen Turnvereen (ATV) Bardörp". De Vereen worr in't Johr 1885 trechtmookt. Man dor worr noch keen Football binnen speelt. 1911 gung de ATV tohoop mit den "Arbeider Turnvereen Phoenix-Sande". Rutsuern dä de "Fre'e Turnerschap Bardörp-Sande". Een Johr later hett dat mit den Football anfungen. Vun 1929 heet der Vereen "Fre'e Turnerschap Bardörp-Lohbrugg" wieldat se den Stadtdeel en annern Namen geven harrn. Bavento weer dat de Vereen för de Lüüd de bi de Bardörper Glashütt in Arbeid stunn. Dat is ok, woso se nich in'n Düütschen Football Bund (DFB) mitspeelt hebbt man in de Arbeider-, Turn- und Sportbund (ATSB). As de Natschoonalsozialisten an't Regeren kemen, worrn all Arbeider-Verenen dichtmookt un verbaden. Nu geev dat in Bardörp bloots noch en groten Footballvereen, un twars den SuS Bardörp (hüüttodaags TSG Bardörp 1860), de Vereen vun de Börgerslüüd. Nah den Tweten Weltorloog hebbt de Brieten all Verenen oplöst man een kunn ne'e Verenen grünnen. Un so worr an'n 20.Januar 1946 de "Allgemeen Sport Vereen Bardörp vun 1885" kort "ASV Bergedorf 85" boren. De Vereen folgt de FT na.

De groten 50er Johren

Mit de 50 Johren hett en Tied anfungen, wo dat bannig good leep bi "85". Nah de Grünnen is de Trupp in 4 Johr glieks tweemool opstegen, vun de veerte rop na de twete Liga. In de Speeltied 1948/49 harr Bardörp dat meist in de Böverliga schafft (de höögste Liga in Düütschland), man se hebbt dat wichtigst Speel mit 3:4 tegen de Harborger TB verloren. In de tokamen Speeltieden weer de Trupp good toweeg wesen in de Amatöörliga Hamborg. 1952 weren se bi de Ennrunn vun de Düütsche Amateurmeesterschap darbi, wo se in'n Viddelfinale mit 0:2 tegen Bremen 1860 rutflogen sünd. Achteran hett "85" dat 1953 un 1954 meist in de Böverliga schafft. Liekers hett dat bit 1957/58 duert, dat dat slumpt mit den Opstieg. As Eersten vun de Amatöörliga mussen se tohoop mit anner Verenen in en Opstiegrunn spelen. De Anfang weer aver mehr slecht as recht. "Bardörp 85" kunn de eersten twee Partien nich wunnen (2-2 tegen den Bremer SV, 1-7 tegen den Itzehoer SV). Man achteran hebbt se de mehrsten Spelen wunnen. Dat wichtigste Speel weer an'n 25.Mai 1958 tohuus in'n Billtalstadion tegen Itzehoe. "Bardörp 85" harr de Nees vörn, mit 5-2. In de hele "Stadt" hebbt de Fans bannig fiert. Een Week later stunn Bardörp in'n Finale vun de Düütsche Amatöörmeesterschap. In'n Stadion Rode Eerd vun Düöpn spelen se tegen den FV Hombruch 09. Dütmool gung dat mit 1-3 slecht för "Bardörp 85" uut. Man Liekers weren bi de Retuur an'n Bardörper Bahnhoff een poor dusend Minschen, de op jem töövt hebbt.