Barry Mansfield Bowen (* 19. September 1945 in Belize-Stadt; † 26. Februar 2010 bi San Pedro Town) weer en Ünnernehmer ut Belize.

Bowen is 1945 as Söhn von Emilie Josephine (* 1918), borene Blancaneaux, un den Ünnernehmer Eric William Mansfield Bowen (1908–?) in Belize-Stadt (to de Tied Brietsch-Honduras) boren. He hett an de Cornell University in Ithaca (New York, USA) studeert un keem denn trügg na Belize. 1968 is he Manager in dat Familienünnernehmen worrn, dat as Affüller de natschonale Lizenz för Coca Cola harr.

1969 hett Bowen tohoop mit sien Vader de Broeree Belikin grünnt un in de Tied von 1976 bet 1980 hett he Belize Airways bedreven. 1978 hett Bowen dat Ünnernehmen von sien Vader övernahmen.

1984 hett Bowen Gallon Jug in’n Distrikt Orange Walk köfft. En Deel von dat Land güng an dat Programme for Belize, op’n Rest warrt nu mit de Chan Chich Lodge en Ökoresort un tosätzlich de eenzige kommerzielle Koffieplantaasch in Belize bedreven.

Von 1996 bet 2011 weer dat Ünnernehmen Belize Aquaculture Ltd., dat Aquakulturen in dat Rebeed twüschen Santa Cruz un Riversdale bedreven hett, in’n Besitt von Barry Bowen.

Von 1998 bet 2008 weer he för de Regerungspartei People’s United Party (PUP) Maat von’n Senaat von Belize.[1]

Bowen weer verheiraadt mit Dixie Summerscales (* 12. Juni 1952). De beiden weren siet 1980 tohoop un harrn ok Kinner, hebbt aver eerst 2004 freet.[2] Bowen is an’n 26. Februar 2010 doodbleven, as he as Piloot von sien egen Fleger (en Cessna 206) bi’t Anflegen von’n Flegerplatz von San Pedro Town (Ambergris Caye) afstört is.[3] De Fleger keem von’n Belize City Municipal Airstrip.[3] Tohoop mit em sünd noch veer annere Lüüd doodbleven.[3] Bowen is an’n 2. März 2010 na en Truurfier in de St. John’s Cathedral (Belize-Stadt) in San Ignacio begraven worrn.

Ehren ännern

Bowen is to Neejohr 2008 Knight Commander von’n Order of St Michael and St George worrn.

Nadem de städtische Flegerplatz von Belize-Stadt von 2012 bet 2016 utboot worrn, hett he 2016 den ne’en Naam Sir Barry Bowen Municipal Airport kregen.

Footnoten ännern

  1. P.U.P. appoints Senators, Channel 5 Belize an’n 8. September 1998
  2. Summerscales and Bowen wed, San Pedro Sun an’n 23. Dezember 2004
  3. a b c Sir Barry Bowen dead at 64, Amandala an’n 2. März 2010