Berti Vogts
Hans-Hubert „Berti“ Vogts (* 30. Dezember 1946 in Büttgen) is en ehmalger düütsch Footballspeler un -trainer.
De Afwehrspeler, de ok den Ökelnaam „Terrier“ harr, speel in sien Jöögd för VfR Büttgen, bevör he 1965 bin Borussia Mönchengladbach anhüern dee, wo he bit 1979 bleev. 419 Bundsligaspelen hett he för Mönchengladbach bestreeden un dorbi 33 Doren schaaten.
För de düütsch Natschonalmannschap hett he van 1967 bit 1978 insgesamt 96 Lännerspelen maakt un dorbi een Door schaaten. He hett an de Football-Europameesterschap 1976 deelnommen. Ok bi de Football-Weltmeesterschapen weer he dorbi, sowohl 1970, as ok 1974, as he mit Düütschland Weltmeester wurr, un 1978 in Argentinien. 1971 un 1979 weer he jewiels Footballer vun dat Johr in Düütschland.
Nah sien aktiv Loopbahn wurr he Trainer bi den DFB. Dor reck he mit de U 16-Mannschap 1984 den Europameestertitel, laterhen övernehm he de U 21-Mannschap. 1990 wurr he Bundstrainer un bleev dat bit 1998. In disse Tiet reck Düütschland de Football-Weltmeesterschapen 1994 un 1998, todem reck he mit de Natschonalmannschap 1996 den Europameesterteitel. 2000/2001 weer he Trainer bi Bayer 04 Leverkusen, wurr dornah 2001/02 Natschonaltrainer vun Kuwait, 2002-2004 Natschonaltrainer vun Schottland. 2007/08 weer he Natschonaltrainer vun Nigeria un sluutend 2008 bit 2014 Natschonaltrainer vun Aserbaidschan.
1996 weer he Welt-Natschonaltrainer, dorto is he ok mit dat Bundsverdeenstkrüüz uttekent wurrn. 2020 wurr he in de Hall of Fame des deutschen Fußballs upnommen.
Borns ännern
- Bernd Rohr, Günter Simon: Fußball-Lexikon, 2004 Copress Verlag, ISBN 3-7679-0829-8
