Beynthemer Landschaap

Dat Beynthemer Landschaap is en Schaapraass ut de Graafschop Beynthem. Dat kann wat verdregen un bruukt nich veel Pleeg. Düt Schaap is de gröttste düütsche Heidschaap-Raass. Man verwandt mit de Heidschnucken is se nich. Veel mehr is düsse Raas ut nedderlannsche un düütsche Maschschaap ruttücht wurrn. Tämlich eng verwandt is dat Schaap mit dat Schoonebeker Schaap ut de Nedderlannen.

Beynthemer Landschape

Dat Bentheymer Landschaap is an de Schuft bi 75 cm hooch. De Bück weert 90 bit 110 kg swaar, de Aulämmer bringt dat up bit to 75 kg. Dat Schaap driggt witte Wull. Üm de Ogen to un an de Fööt hett dat düstere Placken.

De Sellschop för dat Bewohren vun ole Raassen, üm de dat slecht steiht (Gesellschaft zur Erhaltung alter und gefährdeter Rassen, GEH) meent, düsse Raas konn bold utstarven. In de 1970er Johren geev dat bloß noch dree Tüchter in't Eemsland, de bi 50 Beynthemer in't Tuchtbook harrt hefft.

In de Graafschop Beynthem, in dat Eemsland, in de gegend vun den Landkreis Deefholt un in annere Bundslänner, as in Brannenborg gifft dat hüdigendags bi 2.800 Tieren, de in dat Stammbook inschreven sünd. Vunwegen de EU-Richtlinie över dat Tolaten för de Tucht vun Schaapraassen, de nich an Scrapie krank weern könnt, is dat Beynthemer Schaap womööglich in Gefohr, denn bloß jedet 10. Schaap kann nich krank weern an de Scrapie-Süke. In dat Johr 2005 is dat Beynthemer Landschaap to dat Huusdeert vun't Johr utropen wurrn.

Kiek ok bi

• List vun de Schaaprassen

Weblenks

• Wat dat mit de Raass vun dat Beynthemer Schaap up sik hett

Bilder / Rassemerkmale:

• Wat dat för en Raass is, dorto Fotos
• Mehr över de Raass bi den Landes-Schafzuchtverband Weser-Ems
• www.bentheimer-landschaf.de - Informatschoon över dat Beynthemer Landschaap