Blötenhüll

De Blötenhülle oder de Perianth is de Naam for all Blöer in de Blöte vun Todecktsadige, de nich fruchtbor sünd. Se sitt unnen oder buten an de Blöten. De Blötenhüll hett de Upgave, de fruchtboren Deele vun de Blöte to schulen, so lang, as se noch en Knuppen is. Later, wenn de Blome al bleihen deit, schall se Insekten to'n Bestuven anlocken.

Schema vun en Blöte mit Fruchtknotten unnen an: Kelkblöer (2) un Kroonblöer (3) sünd tosamen de Blötenhüll

Formen

En Blötenhüll, de unnerdeelt is in Kelk un Kroon, warrt unlieke Blötenhüll nömmt (wetenschopplich: heterochlamydeesch), en Blötenhüll, de nich in Kelk un Kroon updeelt is, is en lieke Blötenhüll (homoiochlamydeesch) un warrt Perigon nömmt. Wenn de Blötenhüll fehlen deit, as bi Fraxinus excelsior, warrt seggt, de Blöte is naakt (Fackbegreep: apochlamydeisch).

De sunnerlichen Deele vun en Blötenhüll könnt tosamenwussen ween. Dat heet denn bi en lieke Blötenhüll Syntepalie, bi'n Kelk Synsepalie un bi de Kroon Sympetalie.

Historie

De Begreep Perianth is toeerst 1678 vun Jungius bruukt wurrn. Man he meent mit Perianth, just so, as Ray 1682 un Linné 1751 den Kelk. Dormols menen de Wetenschoppslüde, de Blöte, dat weer an un for sik blot man de Kroon. Eerst vun 1815 af an warrt dör Mirbel de Perianth so, as hüdigendags, for de ganze Blötenhüll bruukt.