En Blend is en Whisky, de ut verschedene enkelte Whiskys tosamenmischt worrn is. Man seggt dorto ok Versnitt. As Grundlaag för en Blend warrt faken en Grain-Whisky – dat is en Whisky de jümmerto ut verschedene Koornsorten destilleert warrt – bruukt, to den bit to föfftig annere Whiskysorten bimischt warrt. Op disse Oort un Wies kann de Masterblender dorför sorgen, dat de Smack un de Gööd jümmer gliek blievt. Na’t Mischen warrt de Blend noch en Tiet lang in en Fatt inlagert, dat sik de ünnerscheedlichen Whiskys mit’nanner verbinnen künnt. En Blend schall jümmer in de glieke Oort vun Fatten lagert warrn, üm dat Aroma langsom to övernehmen.

En bekannten Blended Scotch: Johnny Walker

In Schottland warrt dree Orden vun Blends ünnerscheedt:

  • Blended Malts (ok Pure Malts) sünd Whiskys, de blots ut Single-Malt-Whiskys vun verschedene Brennereen versneden warrt. Fröher weer dorför ok de Beteken Vatted Malt begäng. To de bekannten Blended Malts tell to’n Bispeel de Johnnie Walker Green Label, de aver siet 2012 nich mehr produzeert warrt.
  • Blended Grains sünd Whiskys, de alleen ut Grain-Whiskys ut verschedene Brennereen versneden warrt. In’n Gegensatz to de Blended Whiskys warrt dor keen Single-Malt-Whisky bigeven. Begäng weer ok de Beteken Vatted Grain. De eenzige Whisky vun disse Sort is to Tiet de Hedonism vun Compass Box.
  • Blended Scotchs sünd Whiskys, bi de Grain-Whisky mit een oder mehrere Single-Malt-Whiskys versneden warrt. Bekannte Whiskys vun disse Sort sünd ünner annern Johnnie Walker Red Label, J&B oder Ballantine’s.

Dat Utfinnen vun Whisky-Blendings warrt Andrew Usher sen. (1782–1855) un Andrew Usher jun. (1826–1898) toschreven. Andrew Usher sen. schall 1853 sien eersten egenen Blend („Old Vatted Glenlivet“) ut enkelte Single-Malt-Whiskys maakt hebben. Vun 1856 an hett Andrew Usher jun. ok Grain-Whisky bimischt, de ut Koorn wunnen wart, de nich molten warrt. Den „Usher’s Green Stripe“, de dorut entstahn is, gifft ok vundaag noch to köpen.

Ok in Noordamerika warrt Blended Whiskys maakt. So sünd meist all de Whiskys ut Kanada Blended Whiskys. Ok de US-amerikaanschen Whisky-Sorten (Bourbon-, Rye-, Tennessee- oder Corn-Whisky) warrt as Blends anboden. Warrt dor för den Blend een Koornsort mit tomindst 51 % bruukt, steiht de tomeist de in’n Naam binnen (to’n Bispeel American Rye Whiskey).