Börgerkrieg
En Börgerkrieg is en Striet ünner Wapen in de Gemarken vun bloß een eenzigen Staat. Dor sünd verscheden Gruppen ut dat Inland bi togange, man faken maakt ok de utlännschen Mächte dor bi mit. De Striet geiht twuschen de Regeerung un een oder en ganze Reeg vun Gruppen vun Upsternaatschen (Rebellen, Guerilleros), oder düsse Gruppen striedt een gegen de annere. De Börgerkrieg kann Grünn hebben, de up dat Rebeet vun de Politik oder vun de Religion liggt, man dat kann dor ok üm gahn, dat verschedene Völker oder Spraakgruppen sik in'e Plünnen hefft, oder dat Geld un Goot anners verdeelt weern schöllt. Mol wüllt de Upsternaatschen den ganzen Staat in'e Hand kriegen, mol wüllt se en Deel vun den Staat unafhängig maken. In en Börgerkrieg gifft dat faken keen Regeln un up dat Völkerrecht warrt ok nich sunnerlich keken.
Wenn en Upstand slumpen deit un de Ordnung in den Staat warrt denn ümstellt oder ganz nee maakt, warrt vun en Revolutschoon snackt.