Braambusch

De Braambusch oder Braamstruuk (lat.: Genista) is en Geslecht vun Planten. Se höört to de Bottervagelblomen (Faboideae) mit to.

Braambusch
Systematik
Klass: Rosopsida Ünnerklass: Rosidae Ornen: Fabales Familie: Fabaceae Geslecht: Braambusch
Wetenschoplich Naam
Genista
(Linnaeus)

Kennteken

De Braamstrüker hefft faken Twiegen mit Döörn doran. Se wasst as en Struuk oder as Halven Struuk. Wie groot he warrt, kümmt up de Aart up an, man bit hen to 2 m könnt dat woll ween. He wasst up en Pahlwuddel. De Blöer staht nich in Paaren un sünd nich deelt oder dreedeelt. De Blöten sünd tomeist vun gele Farv. Se könnt up- un toklappen oder -springen. Befrucht weert se vun Immen un Hummeln, de de Pollen vun ene Planten na de annere bringt. Man sülvst befruchten is ok begäng. De Saat sitt in Pulen, mol bloß een, bi annere Arden ok en ganze Reeg. Utbreedt warrt de Braamstruuk dör Sleuderfrücht. All Delen vun de Planten sünd giftig.

De Braambusch in de Historie

Vun den Braamstruuk schall de Stadt Bremen ehren Naam vun her hebben. Up de Dünen an de Werser schöllt sunnerlich veel so'n Strüker wussen hebben. Vun den latienschen Naam „planta genista“ hett nu wedder dat engelsche Königshuus Plantagenet sien Naam vun weg. Düsse Plant is den Grünner vun dat Huus sien Teken ween.

Wo de Braambusch vörkümmt

Dat Geslecht kümmt vör in Europa, in Afrika in de Gemarken an de Middellannsche See un in Westasien. As Heckenplanten is dat vun Siedlers ok mitnamen wurrn na Neeseeland. Dor hett sik dat as en aggressiven Neophyten utbreedt.

Systematik

To dat Geslecht höört bi 90 Aarden to, dormank 58 in Europa. Unner annern gifft dat düsse Aarden vun Genista:

Düütschen Naam	Wetenschopplichen Naam
Grisen Braambusch	Genista cinerea
	Genista hirsuta
Rüschenblatt-Braambusch	Genista spartioides
Düütschen Braambusch	Genista germanica
Dornen-Braambusch	Genista acanthoclada
Engelschen Braambusch	Genista anglica
Flünken-Braambusch	Genista sagittalis
Farv-Braambusch	Genista tinctoria
Haar-Braambusch oder Heide-Braambusch	Genista pilosa
Korsischen Braambusch	Genista corsica
Kogel-Braambusch	Genista radiata
Weken Braambusch	Genista tenera
Salzmann sien Braambusch	Genista salzmannii
	Genista monspessulana

Borns

Literatur

• Siegmund Seybold (Rutg.):Schmeil-Fitschen interaktiv, CD-Rom, Wiebelsheim, 2001/2002, ISBN=3-494-01327-6

Weblenken

Braambusch. Mehr Biller, Videos oder Audiodateien to’t Thema gifft dat bi Wikimedia Commons.