Brake

Dit Woort hett noch annere Bedüden: kiek dorför ünner Braak (Mehrdüdig Begreep).

En Brake (ok Braak, Brook oder Brack, man ok Wehle, Wehl un Kolk), is en lüttjen See oder Diek, de an de Stäe tostanne kamen is, wo de Diek braken is.

Tostannekamen

Wenn bi en Stormfloot de Diek braken is un dat Water mit Macht doröver hen strömen deit, denn spöhlt dat grode un deepe Löcker achtern Diek ut. De könnt bit to 15 m deep ween. Na de Floot sammelt sik dor Water in. Fröher is en Brake nich wedder mit Eer aanfüllt un tobuddelt wurrn, dat weer dormols to veel Arbeit. De Diek is denn wedder torechtmaakt wurrn, wenn dat güng, man an de Stäe, wo de Floot inbraken weer, weer denn en Brake to sehn.

Braken gifft dat allerwegens, wo dat Floten gifft, de den Diek in’n Dutt maakt. Also nich bloß an de See, man ok an grode un lüttje Strööm. In Bremen gifft dat alleen in dat Blockland an de Wumme en ganze Reeg vun Braken. In Hamborg finnt sik in Francop un Neefeld dree Braken, in Willemsborg (11 Braken) un in de Veer- un Marschlannen gifft dat welk. Dor heet se Bracks.

Literatur (hochdüütsch)

Günther Helm: Bracks - stille Zeugen dramatischer Ereignisse. In: Lichtwark-Heft Nr. 68. Verlag HB-Werbung, Hamborg-Bardörp, 2003. ISSN-Nr. [1] 1862-3549.

Weblenken

Bracks (as se dor nömt ward) in Veerlannen (Hamborg):

Carlsbrack [2]
Borghorster Brack [3]
Kiebitzbrack [4]
Riepenburger Brack [5]