Carl-Heinz Dirks

Carl-Heinz Dirks (* 1948 in Emden) is en plattdüütschen Schriever.

Dirks is 1948 in Emden boren un hett dat Abitur an dat Gymnasium Emden maakt. He hett toeerst an de Universität Hamborg Düütsch, Nedderdüütsch un Geschicht studeert. Na dat Studium is he Schoolmeester an’t Gymnasium worrn, eerst in Hamborg, denn in Emden. Daar hett he denn blangenbi an de Universitäten Ollnborg un Grönneng noch Nedderlandsch studeert.

He weer 22 Jahr lang Schoolmeester an’t Johannes-Althusius-Gymnasium Emden. 2003 is he an dat Domgymnasium Veern wesselt un to’n 31. Juli 2012 denn in Rohstand gahn. In de Tied as Schoolmeester in Veern hett he toeerst in Ünnerst bi Rodenborg leevt un achterna in Veern, mit sien Rohstand gung he denn torügg na Emden.

Siet 1992 gifft he tohoop mit Hans-Hermann Briese un Johannes Diekhoff (de 2013 overleden is) dat plattdüütsche Bladd Diesel rut. Man dat is nu, 2018, mit de DIESEL 106 vörbi.

He weer in’n Vörstand von’n Vereen Oostfreeske Taal, weer siet 2003 bit 2015 Vörsitter von de Bemsen-Dagfohrt un is siet 2008 Baas von’n Schrieverkring Werser-Eems. Siet Märt 2012 is he in’n Vörstand von’n Arbeidskrink Oostfreesch Schrievers.

2004 hett he för dat Rutgeven von de Diesel den Keerlke-Pries kregen un ok dat Totius-Frisiae-Segel. För sien Wark op dat Rebett van Plattdüütsch kreeg he 2013 dat Neddersassische Verdennstkrüüz an 't Band. 2016 kreeg he tosamen mit Hans-Hermann Briese för de DIESEL de Fritz-Reuter-Literaturpries in Stavenhagen.

2015 hett he de Borsla-Pries kregen för sien Text "Pilgerpad".

Siet Juli 2021 organiseert he dat Oostfreeske Vörleestelefoon 04941-699944: All twee Week en anner plattdüütse Text.

Warken

• De Utrooper’s kleines Buch vom Platt für Anfänger und Touristen. De Utrooper-Verlag, [Leer] 1999, ISBN 3-928245-98-8
• Unner de Buukreem. Plattdüütse Texten van Leevde, Sex, Erotik. Diesel-Verlag, Emden 2006, ISBN 3-934835-06-6
• De 100 moiste oostfreeske plattdüütse Gedichten. Diesel-Verlag, Emden 2008, ISBN 978-3-934835-05-4

Kiek ook bi

• List vun plattdüütschen Schrievers

Weblenken

• Carl-Heinz Dirks in de Datenbank Die niederdeutsche Literatur (hoogdüütsch)

Carl-Heinz Dirks Homesiet: http://www.ce-ha.de

http//:www.schrieverkring.de