Carl August Moritz Schlegel
Carl August Moritz Schlegel (* 25. September 1756 in Zerbst; † 29. Januar 1826 in Horborg) weer en düütschen Theoloog.
Schlegel is 1756 as Söhn von Johanna Christiana Erdmuthe, borene Hübsch (10. April 1734–21. Januar 1811), un den Hoffpreddiger Johann Adolph Schlegel (17. September 1721–16. September 1793) in Zerbst boren.[1][2] Twee von siene Bröder weren August Wilhelm Schlegel un Friedrich Schlegel, Johann Elias Schlegel weer sien Unkel. He hett later an de Universität Göttingen Theologie studeert.[2] Na dat Studium weer he toeerst Huuslehrer von en Herrn von Lützow in’t Mekelbörgsche.[2] He is 1785 Pastoor an de St.-Nicolai-Kark in Bothfeld un 1790 Archidiaken an de Dreefaltigkeitskark in Horborg worrn un weer denn von 1796 bet 1816 Supperndent von de twete göttingsche Inspekschoon un Pastoor von de Jacobi-Kark in Göttingen.[2] 1817 hett he sien Dr. theol. maakt.[2] Von 1816 bet to sien Dood 1826 weer he eersten Pastoor an de Dreefaltigkeitskark in Horborg un Generalsupperndent von de Generaldiözees Horborg.[2]
He hett an’n 8. Juni 1784 in Hamborg Anna Christiana Trummer (27. März 1757–31. August 1843) freet.[1] De beiden harrn de Kinner Marie Christiane Wilhelmine (23. April 1785–11. März 1846), Johann Adolph August (10. Oktober 1788–9. März 1840) un Marianne Henriette Amalie (* 25. Juli 1797).[3][1] Schlegel is 1826 in Horborg doodbleven un an’n 3. Februar 1826 in Wilstörp begraven worrn.
