Chicken Run
Chicken Run (op Platt so veel as „Höhner-Flucht“, dt. Titel: Chicken Run – Hennen rennen) is de Titel vun en Filmkummedie ut dat Johr 2000. Dat is en Kneedtechnik-Trickfilm, de mit de Stop-Motion-Technik dreiht worrn is. Produzeert weer de Film in Grootbritannien vun Aardman Animations in Tosamenarbeit mit DreamWorks Pictures.
| Filmdaten | |
|---|---|
| Plattdüütsch Titel: | — |
| Originaltitel: | Chicken Run |
| Düütsch Titel: | Chicken Run – Hennen rennen |
| Produkschoonsland: | Grootbritannien |
| Johr vun’t Rutkamen: | 2000 |
| Läng: | 81 Minuten |
| Originalspraak: | Engelsch |
| Öllersfreegaav in Düütschland: | FSK 6 |
| Filmkru | |
| Speelbaas: | Peter Lord Nick Park |
| Dreihbook: | Peter Lord Nick Park Karey Kirkpatrick |
| Produkschoon: | Peter Lord Nick Park David Sproxton |
| Musik: | Harry Gregson-Williams John Powell |
| Kamera: | Tristan Oliver Frank Passingham Dave Alex Riddett |
| Snitt: | Mark Solomon Robert Francis Tamsin Parry Vicki Hiatt |
| Dorstellers | |
| |
Inholt
ännernIn den Film dreiht sik dat üm de „Inwahners“ vun en Höhnerhoff. Vertellt warrt de Geschicht vun de rebellsche Hohn Ginger, de sik in een Tour Gedanken dorüm maken deit, woans se ut jemehr Gefängnis utneihn künnt. Man, dat is nich so eenfach, vun wegen dat jemehr Höhnerhoff hooch intüünt is un buten ok noch Hunnen rümlopen doot, de op de Utbrekers losgaht. Un den is dor noch Mr. Tweedy, de sien Ogen nich vun de Höhner lett. He steiht ünner den Pantüffel vun sien Fro Mrs. Tweedy, de op’n Hoff en streng Regiment föhrt: De Hoff mutt Geld afsmieten, un wenn en Hohn nich noog Eier leggt, denn lannt se in’n Kaakputt.
Een Dag lannt de amerikaansche Hahn Rocky in’n Höhnerhoff, as he vun wiet weg över’n Tuun flagen keem. Ginger kriggt dordör ne’e Hapen, dat se nu opletzt doch noch ut jemehr Gefangenlager utbreken künnt. Se glöövt neemlich, dat Rocky ut egene Kraft flegen kann un jem dat Flegen bibringen kann. Rocky lett sik dat gefallen, as he bi de Höhner as Hahn in Korf ’n fein Leven hett. As sien Flunk bi sien harde Lannen besehrt worrn is, kann he sülvst al so nich flegen, un lett sik dat goot gahn, wiel he mit de Höhner en improviseert Training anfangt. Man, denn kriegt de Höhner dat aver hüll, as Mrs. Tweedy sik vun’t Eierverköpen op en ne’e Gewarfsidee ümstiggt: Se lett sik en Maschien kamen, mit de man Höhnerpastete maakt. Bun nu an warrt nich mehr kontrollerrt, dat de Höhner ok fein Eier leggt hebbt, man dat se sik schön rund un fett freten doot. Natürlich is Ginger de eenzige, de foorts markt, dat wat fuul is. Man utrekent Ginger warrt nu as Versöökshohn in de Maschien steken, üm den Apparat to testen. In letzte Sekunn kann Rocky ehr ünner grote Gefohr ut de Maschien freemaken. Dorbi geiht de Apparat in’n Dutt, wat ’n beten Tiet bringt för de Höhner.
As dat nu aver eernst warrt op’n Höhnerhoff, maakt Rocky sik in de Nacht op’n Weg un löppt weg. För Ginger lett he en Stück Plakaat torüch, op dat se sehn kann, dat Rocky gor nicht sülvst flegen kann, man mit en Kanoon dör de Luft schaten weer. Dormit is ehr Droom vun de Flucht platzt. Aver vullstännig opgeven wüllt de Höhner nu doch nich. Dor kummt jem de Infall, dat de olle Hahn Fowler fröher mol bi de Royal Air Force weer. Woll weer he dormols blots as Glücksbringer an Boord, man ünner sien Regeer boet de Höhner nu ünner grote Tietnoot en Höhnerhütt to’n Fleger üm, mit den se sik över’n Tuun flegen wüllt. Opletzt kriegt se dat hen un künnt denn wohrhaftig utbreken un en nee Leven in Freeheit anfangen
Stimmen
ännern| Rull | Originalspreker | Düütsche Synchroonisatschoon |
| Ginger | Julia Sawalha | Heidrun Bartholomäus |
| Rocky | Mel Gibson | Ingolf Lück |
| Babs | Jane Horrocks | Dagmar Biener |
| Bunty | Imelda Staunton | Regina Lemnitz |
| Fetcher | Philip Daniels | Michael Pan |
| Fowler | Benjamin Whitrow | Hans Teuscher |
| Mac | Lynn Ferguson | April Hailer |
| Mrs. Tweedy | Miranda Richardson | Barbara Ratthey |
| Mr. Tweedy | Tony Haygarth | Klaus Sonnenschein |
| Nick | Timothy Spall | Gerald Schaale |
Achtergrund
ännernIn den Film gifft dat en Reeg vun Anspelen un Zitaten vun Filmklassikers as The Great Escape, The Flight of the Phoenix, The Bridge on the River Kwai oder Empire of the Sun. In de Szenen twüschen Rocky un Fowler warrt mit veel Humor ok de kulturelle Kunflikt twüschen de Briten un de Amerikaners dorstellt.
Utteken
ännernDe Film weer vör knapp föfftig Filmpriesen vörslahn, dorünner ok för den Golden Globe. Wunnen hett Chicken run knapp de Hälft vun de Priesen, ünner annern:
- 2000: den Sierra Award in de Kategorie Best Familienfilm.
- 2000: den NYFCC Award in de Kategorie Best Animatschoonsfilm.
- 2001: den ASCAP Award in de Kategorie Top Box Office Films för John Powell un Harry Gregson-Williams.
- 2001: den BMI Film Music Award för Harry Gregson-Williams.
- 2001: den Peter Sellers Award for Comedy för Peter Lord un Nick Park.
- 2001: den Genesis Award in de Kategorie Speelfilm.
- 2001: den ALFS Award in de Kategorie Britisch Film vun’t Johr.
- 2001: den ALFS Award in de Kategorie Britisch Produzent vun’t Johr för Peter Lord, Nick Park unDavid Sproxton.
- 2001: den Young Artist Award in de Kategorie Best Familienspeelfilm – Animatschoon.
- 2001: den Golden Satellite Award in de Kategorie Best Speelfilm, animeert or mischt Medien.
Weblenken
ännern- Chicken Run in de Internet Movie Database (engelsch)
- Kritiken to’n Film op Rotten Tomatoes