Chongjin

Chongjin (koreaansch 청진) is en Havenstadt an’e Münn von’n Sosong in de Bucht von Oost-Korea (Deel von de Japaansche See) in de Provinz Noord-Hamgyong von Noordkorea. De Stadt hett 325.489 Inwahners (Stand 1. Januar 2005).

Russland un China bedrievt en Kunselaat in Chongjin.

In dat Lager Chongjin schöölt so üm un bi 3000 Fungene leven.

Historie

De Region weer vör de Tied von de Japaansche Herrschop in Korea vonaf 1910 man dünn besiedelt. Chongjin weer en lütt Fischerdörp un hett ünner de Japaners Seishin heten. De Japaners hebbt den Haven 1908 denn utboot, dat se de Ressourcen ut dat Achterland (to’n Bispeel Köhlen un Arz ut’n Kreis Musan) beter aftransporteren kunnen. Ok en Stahlwark hebbt se dor denn boot. Vonwegen de japaanschen Plaans, de Mandschurei intonehmen, hebbt se in de Stadt denn ok en Garnison inricht, in de de 19. Infanteriedivision von de Kaiserlich Japaansche Armee seten hett.

In’n Koreakrieg 1950 bet 1953 is de Stadt swoor utbummt worrn, besünners bi en Angreep von US-amerikaansche Flegers an’n 19. August 1950.

Von 1960 bet 1967 un wedder von 1977 bet 1985 weer de Stadt egenstännig un nich Deel von en Provinz. 1985 is se denn Deel von Noord-Hamgyong worrn un weer denn ok glieks de Höövdstadt.

Verkehr

De Stadt liggt an de Pyongra-Iesenbahnlien, de na Rason in’n Noordoosten un Pjöngjang in’n Süüdwesten löppt.

De Chongjin hett en twee Kilometer lange Lannbahn un warrt vör allen för Reisen in’t Binnenland bruukt.

In de Stadt gifft dat mit de Stratenbahn Chongjin en 13 km lang Stratenbahnsystem.

Weertschop

Chongjin hett Stahl- un Maschinenboindustrie, en Gummifabriek, Warften un en Lokomotivenwark. Bi de Fischeree is vör allen de Fang von Blackfisch wichtig.

Delen

De Stadt is opdeelt in söven Stadtdelen:

Chongam (청암; 青岩)
Pohang (포항; 浦港)
Puyun (부윤; 富潤)
Ranam (라남; 羅南)
Sinam (신암; 新岩)
Songpyong (송평; 松坪)
Sunam (수남; 水南)

Ünnerafdelen von Noord-Hamgyong

Städer: Chongjin (Höövdstadt) | Hoeryong | Kimchaek | Rason

Koordinaten:41° 48′ N, 129° 47′ O