Claude Le Jeune
Claude Le Jeune (* üm 1530 rüm in Valenciennes; † Enn September 1600 in Paris) weer en fläämsch Komponist in Frankriek.
He leev in Paris un harr mit de Dichtergrupp La Pléiade to doon. Ofschoonst he to de Reformeerte Kark tohören dö, un in dat Johr 1590 nah La Rochelle utbüxen möss, höör he to de Hoffkapell vun den vörmalig reformeerten König Hinrich IV. to. Dat keem woll, vunwegen dat sien Fründ, de Komponist Jacques Mauduit en goot Woort för em inleggt harr. 1596 is he to'n „königlichen Kammerkomponisten“ maakt wurrn. He is in Paris storven un an'n 28. September 1600 ünner de Eer kamen.
He hett verscheden Malen an den Psalter vun Genf arbeit un dor Chorwarken över schreven. De Utgaav mit Warken över all Psalmen is in dat Johr 1601 nah sienen Dood rutkamen. Ünner annern is düsse Utgaav in de Johren 1646 in Amsterdam, 1669 in Basel mit den düütschen Text vun Ambrosius Lobwasser un 1733 ok noch in Strada in dat Ünnerengadin mit en rätoromaanschen Text rutbröcht wurrn.
Mank siene Warken sünd:
- 150 Psaumes de David à 4 voix
- Psaumes en vers mesurés, de 2 à 8 voix (Teksten vun de Baïf un Agrippa d'Aubigné)
- Octonaires de l'inconstance et de la vanité du monde