Columbus-Center Bremerhoben

Dat Columbus-Center in Bremerhoben is en Gebüüdkomplex op de Oostsied von’n Olen Haven, de de Bremerhobener Footgängerzoon un de Binnenstadt von dat Havenbecken trennt un to en Wohrteken von de Stadt worrn is.

De Ole Haven un dat Columbus-Center

Dat Columbus-Center hett de Bremer Architekt Peter Weber 1970/1971 bi en Architektenweddstried utklamüsert. An’n 1. Dezember 1975 hebbt se anfungen to boon. In dat Johr is ok al de Ole Haven ümgestaltet worrn un dat Düütsche Schippfohrtsmuseum hett apenmaakt. Inwieht hebbt se dat Center 1977.

Dat Columbus-Center besteiht ut twee Parkdecks, över de op twee Etaaschen en Inkoops- un Deenstleistungszentrum mit üm un bi 75 Ladens, Restaurants etc. op över 30.000 m² liggt. Ünner annern hett hier ok Radio Bremen en Regionalstudio. Över disse Basis reckt sik dree Hooghuustoorns, de bet to 88 Meter hoog sünd. De Toorns sünd de Schorsteens von Scheep nabillt. Dor doot alltohoop 555 Wahnungen in liggen. Güntsied dat Havenbecken is dat Düütsche Schippfohrtsmuseum, dat Inkoopszentrum Mediterraneo, dat 2008 apenmaakt hett, un dat Klimahuus Bremerhoben. En mit Glas överdackt Footgängerbrügg verbinnt disse Gebüüd mit dat Columbus-Center. An de Steed von dat ole Werser-Forum is 2011 de Boafsnidd Werserpassaasch boot worrn, de op de Sied von’n Olen Haven mehr Ladens un en Togang to de Parkplätz blangen dat Gebüüd un to de Bushollsteed an de Columbusstraat büddt.

De Inkoopspassaasch driggt den Stratennaam „Bövere Börger“ anlehnt an de Bremerhobener Hauptinkoopsstraat Börgermeester-Smidt-Straat, de kort ok „Börger“ nöömt warrt.

Columbus-Statue

De Columbus-Statue vör dat Columbus-Center

In de Midd twüschen de twee höögsten Gebüüd von dat Columbus-Centers steiht de Columbus-Statue (Laag: 53° 33′ N, 8° 35′ O). Dat weer en Spenn von’n Partikulier Bernhard von Glan, de in Amerika riek worrn is un sik in sien Geboortsoort to Roh sett hett. He hett de Statue bi’n Bildhauer Ludwig Habich in Opdrag geven un 1897 is se in’n Park von Speckenbüttel opstellt worrn. De Statue is in’n Eersten Weltkrieg för de Rüstungsindustrie insmölt worrn. 1960 hebbt se dat Original-Gipsmodell wedderfunnen un 1978 is de Statue nee in Bronz gaten un an ehren hüdigen Platz opstellt worrn.

Weblenken

Columbus-Center Bremerhoben. Mehr Biller, Videos oder Audiodateien to’t Thema gifft dat bi Wikimedia Commons.

• Websteed von dat Columbus-Center (hoochdüütsch)