Cova Figueira

Cova Figueira is en Oort in’n Oosten vun’t Eiland Fogo in de Republiek Kap Verde. De lütte Stadt is siet 2005 ok de Sitt vun den Gemeen Santa Catarina do Fogo.

Geografie

Cova Figueira liggt in’n Oosten vun Fogo un ligg nich wieter as’n Kilometer weg vun de Atlantikküst. De Landschop ümto is prägt vun den Vulkan, de dat hele Eiland utmaakt. De Oort Cova Figueira befinnt sik an de Oostflank vun den Vulkanbarg in en teemlich piel anstiegen, felsig Land Land.

Üm den Oort rüm un an de Küst gifft dat Lännereen, de to’n Ackerbo oder för de Veehtucht döögt. De Rest is vun Stenen dörsett oder dröög Grasland. Vun de Stadt ut föhrt en Straat na Nooorden to, de bit na Mosteiros an de Noordküst föhrt. Man de is nich mehr to bruken, vun wegen dat se bi’n Vulkanutbrook tonichten maakt worrn is. Na’n Westen to verlöpt se tweedeelt as’n Krink üm den Barg rüm: Ruchweg twee Kilometer ut’n Oort rut twiegt de Straat op in de ünnere un de bövere Straat. Vun de böveren twiegt in Achada Furna en Straat af, de na’n Vulkan rop in de Chã das Caldeiras föhrt, woneem de jüngste vun de Vulkankegels, de Pico de Fogo, liggt.

Weertschop un Infrastruktur

Cova Figueira is de drüttgröttste Stadt vun Fogo, liekers is in de Stadt nich veel to finnen oder to sehn. De Levensstandard is siet, vun wegen dat bit in dat late 20. Johrhunnert keen Geld dor weer. De meisten Lüüd sünd Buerslüüd, de jemehr Utkamen mit Bananenplantaschen, Ananas un annere Aaft- un Grööntüüchsorten verdeent. Wat dat nich in dat Rebeet gifft, mutt över de Hööftstadt São Filipe ranschafft warrn. De Versorgen mit elektrischen Stroom un Telefon is an’n Enn vun’t 20. Johrhunnert inricht worrn und warrt wieter verbetert.