Cyril George Xavier Henriques

Cyril George Xavier Henriques (* 5. Juli 1908 in Kingston; † 18. Juni 1982 ok dor) weer en jamaikaansch-brietschen Jurist.

Henriques is 1908 as Söhn von Edith Emily, borene Delfosse, un den Koopmann Cyril Charles Henriques in Kingston (Jamaika) boren.[1] Siene jüngere Süster weer Pauline Henriques un sien Broder Fernando Henriques. He güng in Jamaika op dat St. George’s College.[1] 1919 is de Familie von Jamaika na Grootbritannien ümtagen un Henriques weer dor von 1919 bet 1928 op dat St. Francis Xavier College in Clapham.[1]

Henriques hett in’n Juli 1938 Marjory Brunhilde Burrowes freet. De beiden harrn twee Döchter.[2]

He hett an dat University College London Juristeree studeert un is an’n 6. Mai 1936 in Grootbritannien as Avkaat un Maat von’n Inner Temple tolaten worrn.[1] An’n 19. August 1936 is he tosätzlich in Jamaika as Avkaat tolaten worrn.[1] Dor hett he denn ok von 1936 bet 1939 as Avkaat praktizeert.[1] Von 1939 bet 1944 weer he Crown Counsel un von 1944 bet 1950 Magistraat.[1] 1950 is he för korte Tied Solicitor General worrn.[1]

He weer denn von 1950 bet 1956 Generaalstaatsanwalt von Brietsch-Honduras un för wisse Tieden twüschen 1953 un 1956 ok Böverst Richter.[1]

Von 1958 bet 1963 weer he Böverst Richter von de Windward and Leeward Islands. Twüschen 1958 un 1962 weer he in düsse Tied ok fakener Administrater von St. Lucia.[1] Henriques is 1963 bet 1968 Richter an’n Appeal Court of Jamaica ween un is 1967 Präsident von dat Gericht un dormit Lord Chief Justice von Jamaika worrn.[1]

He is an’n 18. Juni 1982 in dat Nuttall Memorial Hospital in Kingston doodbleven.[2] He hett toletzt in Ocho Rios leevt.

EhrenÄnnern

To Neejohr 1963 is he to’n Ridder (Knight Bachelor) slahn worrn.[3]

FootnotenÄnnern

  1. a b c d e f g h i j k Personalities Caribbean. Personalities Limited, 1973, Sied 489
  2. a b Who was who: A Companion to Who’s Who, Containing the Biographies of Those who Died. A. & C. Black, 1981, Sied 344
  3. Supplement, The London Gazette an’n 28. Dezember 1962, Sied 2