Dammann Maschinenbo
De Herbert Dammann GmbH is en Maschinenbo-Ünnernehmen ut Heendörp, dat Sprütten för de Bueree herstellt. Baas von dat Ünnernehmen is Nadine Dammann. Dammann hett 107 Mitarbeiders in Lohn un maakt en Ümsatz von 18 Millionen Euro.[1]
Historie ännern
Dat hüdige Ünnernehmen is an’n 15. März 1979 von Herbert Dammann grünnt worrn. Aver ok vörher hett Dammann al siet 1968 Maschinen boot. In dat Johr hebbt se de eerste Plantenschutzsprütt mit en automaatsch klappend Gestäng un en Arbeidsbreed von 15 Meters boot.
1983 is de eerste Unimog-Opbosprütt mit en Arbeidsbreed von 36 Meter boot worrn un 1984 de eerste Sülvsfohrer.
To de Dammann GmbH höört ok en Unimog-Verdragswarksteed.[2]
Produkte ännern
HD Night-Lux ännern
Bi de Sprüttkegelbelüchtung Night-Lux warrt de Sprüttkegels von enkelte LEDs anstrahlt. So kann ok in’n Düüstern sprütt warrn. Dat System is kumbineert mit Hinnerniserkennungssystemen.[3] För Night-Lux hett Dammann von de DLG 2009 en Sülvermedallje kregen.
Dual-Air-System ännern
Dat Dual-Air-System is en System, dat ünnerstütt von Luft sprütt. Dorbi warrt de Sprüttstrahl dör en Luftstrahl schützt, de vör un achter de Düüs in’n Bestand dringt. Dat helpt, dat een to’n Bispeel in’e Kartuffeln en gode Bestandsdördringung henkriggt. De Luftleistung liggt bi rund 50.000 Kubikmeter Luft in’e Stünn.[4]
TSD-System ännern
Mit dat TSD System (Teilflächen spezifische Düsenleitung) köönt bi een Överfohrt twee Behandlungen maakt warrn.[5] Dorto sünd Pumpen, Düsenleitung, Armaturen un Regelinrichtungen dubbelt vörhannen. Wenn mit de Eenheit A en ganzflächige Behandlung dörföhrt warrt, kann mit Eenheit B en punktuelle Behandlung daan warrn. Dorto hett de Eenheit B Quattrodüsendregers. Dorbi warrt verschedene Düsen gliektiedig aktiveert üm in’n optimalen Druckbereich to blieven, wieldes de Opwandmenge sik ännert. Eenheit B warrt dör Applikatschoonskoorten oder dör Sensoren an’t Gestäng stüürt.
Dammann Trac ännern
De Dammann Trac DT 3200 H is en groten Sülvsfohrer mit 25 t tolässig Gesamtgewicht. He warrt andreven von en Mercedes-Motor mit 324 PS un hett en maximal Tempo von 40 km/h. Fattvolumens bet 12.000 Liter sünd jüstso mööglich as Arbeidsbreden bet 42 Meter. Dat Fohrtüüg kann ok tohoop mit en Grootflächenstreier to’n Düngen bruukt warrn.
Footnoten ännern
- ↑ Johrsafsluss to’n 30. Juni 2010, ebundesanzeiger.de
- ↑ Geschicht von de Firma Dammann
- ↑ Landtechnikmagazin.de
- ↑ Dual-Air-System
- ↑ Dammann Neuheiten 2012 (PDF; 1,9 MB)
Weblenken ännern
Dammann Maschinenbo. Mehr Biller, Videos oder Audiodateien to’t Thema gifft dat bi Wikimedia Commons.
- Websteed von dat Ünnernehmen (hoochdüütsch)