Deutsche Real Estate
De Deutsche Real Estate AG is en Immobiliensellschop mit Sitt in Berlin, de an de Börs noteert is (ISIN DE0008055021). Dat Ünnernehmen kunzentreert sik op Büro-, Enkelthannels- un Logistikimmobilien in en Tall düütsche Städer. De Bilanzsumm liggt bi 334,9 Milljonen Euro (Stand 30. Juni 2014)[1] un de Ümsatz bi 28,6 Milljonen Euro (Stand 2013)[2]. Dat Ünnernehmen hett 43 Mitarbeiders (Stand 30. Juni 2014)[1]
Börs
ännernDe meist 20.582.200 Aktien von de Sellschop warrt an de Frankförter Börs ünner de WKN 805502 hannelt. De Deutsche Real Estate AG is in’n CDAX un in’n DIMAX noteert. 78,98 % von de Aktien höllt de Summit Group, 5,75 % Klaus-Peter Schneidewind un noch wedder 5,75 % Clemens Vedder. 9,52 % von de Aktien sünd in Streihbesitt.[3]
Historie
ännernDat Ünnernehmen is an’n 24. November 1871 as Geestmünner Bank AG in Geestmünn grünnt un an’n 27. Dezember 1871 in dat Hannelsregister indragen worrn. To de Grünners hebbt ünner annern Rickmer Clasen Rickmers, Wilhelm Anton Riedemann un Johann Georg Wolde höört. To’n 1. Januar 1872 hett de Bank den Bedriev opnahmen. Noch in dat sülve Johr is de Bremerhobener Bank in Bremerhoben as Filiaal grünnt worrn.[4] De Bank schull vör allen för de Schippfohrt un de Fischweertschop in de Havenöörd Geestmünn un Bremerhoben dor ween. Noch bet in de Johren 1980 hett dat Ünnernehmen as Bank von de Fischweertschop gullen. 1908 hett de Bank en Geschäftsteed an’n Bremerhobener Fischereehaven opmaakt un 1942 dat Wikinghuus an’n Fischereehaven övernahmen.[4] De dree Gebüüd von de Bank sünd 1944 all utbummt worrn un de Bank is in en Nevenstell von de Rieksbank ünnerkamen.[4] In de Tied von 1967 bet 1976 hett de Bank söss Filialen in Bremerhoben apenmaakt.[4]
Siet 1937 is de Bank an de Hambörger Börs noteert ween un siet 1950 an de Bremer Börs.[4]
1982 is de Hauptsitt von de Bank von Geestmünn na Bremerhoben-Midd in dat Geestbank-Huus ümtagen, dat 1978 apenmaakt hett.[4] 1983 hett de Geestmünner Bank de veer Geschäftsstellen von de ADCA-Bank in Bremerhoben övernahmen.[4] In de Tied von de Johren 1970/1980 weren dat Bankhuus Lampe un de Staatliche Kreditanstalt Ollnborg-Bremen grote Andeelseegners.[4] Bet in de Midd von de Johren 1980 hett de Staatliche Kreditanstalt Ollnborg-Bremen, later Bremer Landsbank Kreditanstalt Ollnborg, de Mehrheit övernahmen.[4] Deelwies is dat Ünnernehmen ok Geestbank nöömt worrn.
1986 hett de Vereens- un Westbank ut Hamborg 82 % von dat Aktienkapitaal övernahmen. Dat kumplette Bankgeschäft is tohoop mit de Mitarbeiders 1997 an dat Bankhuus Neelmeyer AG ut Bremen afgeven worrn. De Sellschop hett denn den ne’en Naam Geestmünner Verwaltungs- un Grundstücks Aktiensellschop (GVG) kregen. De Banklizenz hebbt se trügggeven. 1998 hett de WCM de Mehrheit övernahmen un dat Ünnernehmen an de HBAG Real Estate AG verköfft. Op de Hauptversammlung von de GVG an’n 13. April 1999 is beslaten worrn, dat dat Ünnernehmen in Tokumst Deutsche Real Estate AG heten schall.[5]
In’n August 2004 is de Verwaltung von Berlin na Hamborg ümtagen un in’n August 2009 wedder trügg von Hamborg na Berlin.
Vörstand
ännern- –2012: Matthias Kobek
- 2012–: Boaz Rosen[6]
Literatur
ännern- Peter Hars: 100 Jahre Geestemünder Bank. Geestmünner Bank, 1971
Footnoten
ännern- ↑ a b Halvjohrsbericht von’n 27. August 2014 (PDF; 1,4 MB)
- ↑ Geschäftsbericht 2013 (PDF; 3,1 MB)
- ↑ Aktionärsstruktur der Deutsche Real Estate AG Mai 2009
- ↑ a b c d e f g h i http://www.dwalive.de/de/DWA-Auktion-5/?AID=99584&AKTIE=Geestem%FCnder+Bank
- ↑ Historie der Geestemünder Bank AG
- ↑ DGAP-Meldung vom 15. Juni 2012
Weblenken
ännern- Websteed von de Deutsche Real Estate AG (hoochdüütsch)