Dow-Wark Stood

Dat Dow-Wark Stood is en Industriewark von de chemische Industrie bi Bützfleet (höört to de Stadt Stood), dat to’n Kunzern DowDuPont tohöört. Bedreven warrt dat Wark von de Dow Deutschland Anlagengesellschaft mbH. Dat Wark liggt op Bützfletersand an dat Över von de Elv.

Luftbild von Bützfletersand mit dat Dow-Wark

Logo von dat Moderünnernehmen Dow

Historie

De Bo von dat Wark hett in’n Oktober 1969 anfungen un 1972 kunn dat Wark de Produkschoon opnehmen. De Anlaag is allens tohoop 550 Hektar groot. Dat Moderünnernehmen Dow Chemicals (siet 2017 DowDuPont) hett över de Tied mehr as 4 Milljarden Euro in dat Wark investeert. Dat Wark bedrifft ok en egene Warksfüürwehr.

To de Produkten höört ünner annern Propylenoxid, Propylenglykol, Perchlorethylen, Chlor un Chlorprodukten, Natronlaug un Waterstoff.

Dat Wark höört to de gröttsten Energieverbrukers in de Bundsrepublik Düütschland un verbruukt Stand 2012 0,9 % von allen Stroom in Düütschland. Dat weer mit en Grund, dat to de sülve Tied as dat Dow-Wark boot worrn is, ok dat Karnkraftwark Stood in Bedriev gahn is. Dat Dow-Wark hett üm un bi een Drüddel von de Energie von dat Kraftwark verbruukt. 2013 hett dat Wark för 300 Milljonen Euro en Gaskraftwark boot.

In dat Wark doot 1300 Lüüd för Dow arbeiden un noch en poor hunnert Lüüd tosätzlich bi Drüddfirmen. Dormit is dat Dow-Wark na de Elbe Kliniken Stade-Buxtehude de tweetgröttste Arbeidgever in’n Landkreis Stood. Dat Wark stellt in’t Johr üm un bi 3 Milljonen Tunnen Chemikalien her.

Baas von dat Wark

• 1972–: Ted Walker
• Juli 2000–2004: Manfred Aumann
• 2004–30. April 2009: Rudolf Lamm
• 1. Mai 2009–31. Dezember 2010: Reiner Roghmann
• 1. Januar 2011–31. März 2013: Arnd Thomas
• 1. April 2013–31. Juli 2018: Dieter Schnepel
• 1. August 2018–: Bridget Sparrow

Weblenken

• Websteed to dat Wark op dow.com (hoochdüütsch)