Dwangsaukschoon

Wie dat mit dat Recht in Düütschland utsütt

De Dwangsaukschoon (Subhastation) is en Dwangsvullstrecken, so as dat in de Zivilprozessordnung (ZPO) vörschreben is. Dat Vörgahn bi de Dwangsaukschoon is in dat Gesett öber de Dwangsaukschoon un Dwangsverwalten (Zwangsversteigerungsgesetz) regelt.

Grund

Bi de Dwangsaukschoon hölpt de Staat mit sien Macht, en Anspröök dör to setten. De wat to kriegen hett (Gläubiger), hett dor de Möglichkeit mit, vunwegen, dat he en Geldschuld infoddern kann, an dat unbeweglich Vermögen vun en Annern ran to kamen. He „vullstreckt“ in dat unbeweglich Vermögen vun den Schulliger un kriggt so, wat he to kriegen hett. Unbeweglich Vermögen sünd Grundstücken un wat dor up boot is, Egendom an Wohnungen un Buwarken un „Erbbaurecht“. Ok Scheepe un Flegers weert as unbeweglich Gegenstänn ankeken, wenn se in en Register inschreben sünd. Dor gifft dat aber besünner Vörschriften vör.

De Andrag, dat en Dwangsaukschoon in Gang bröcht weern schall, kann ut verscheden Grünnen stellt weern. Een Möglichkeit is, vunwegen en Grundschuld oder Hypothek. En anner Möglichkeit is, vunwegen dat een persöönlich Geld to kriegen hett. Wenn in dat Grundbook en Last inschreben is, denn lohnt sik de Aukschoon faken bloß ut en Grundschuld oder Hypothek, besunners ut en Last in den eersten Rang.

En besunner Aart vun Dwangsaukschoon is de Aukschoon to’n Updelen to’n Uplösen vun de Gemeenschup.

Anners as dat Dwangsverwalten, de dat bloß up den Erdrag vun en Grundstück afsehn hett, bedutt de Dwangsaukschoon, dat een an de Saak süms rangeiht.

Verfahren

Wie de Andrag stellt warrt

Bi de Dwangsaukschoon mutt de, de wat to kriegen hett (de Gläubiger) en Andrag stellen, dat de Dwang vullstreckt warrt. De Rechtspleger kickt denn nah, ob de Andrag richtig stellt is un ob de Saak ok so steiht, wie dat nödig is, dat een Dwangsaukschoon anordent weern kann. Dor is bi vörutsett, datt en Titel to’n Vullstrecken vörliggt un ok en Klausel to’n Vullstrecken. De Titel to’n Vullstrecken mutt tostellt wurrn sien. Wenn denn de Besluss drapen is un dat Verfahren anordent, denn warrt dat so ansehn, datt dat Grundstück in’n Beslag nahmen wurrn is för den, de wat to kriegen hett. In dat Grundbook in Deel II warrt denn inschreben, dat de Dwangsaukschoon anordent is.

De wat schullig is (Schuldner) kann nah § 30a ZVG den Andrag stellen, dat de Dwangsaukschoon instellt warrt. De Andrag mutt binnen twee Weken stellt weern, vun dor af an, wo de Besluss för de Dwangsaukschoon tostellt wurrn is. Düsse Andrag hett gode Utsichten, wenn de, de wat schullig is, bewiesen kann, dat he sien Schullen binnen sess Monaat utglieken kann. Wenn dat so steiht, denn warrt de Dwangsaukschoon för höchstens sess Monaat instellt. Dat Gericht kann aber seggen, vun wat för Ümstänn düt Instellen afhangt.

Ok de wat to kriegen hett, kann de Dwangsaukschoon nah § 30 ZVG instellen laten. So lang as dat Verfahren löppt kann he dat maken. Dor gifft dat towielen gode Grünn för, t. B. wenn een noch mol verhanneln will oder wenn he nich inverstahn is mit dat Meistgebot, wat bi de Aukschoon rutkamen deit.

De wat to kriegen hett, kann bloß twee mol seggen, dat he inverstahn is mit dat Instellen vun de Aukschoon. Wenn he dat to’n drüüden Mol deit, denn gellt dat as Enn vun dat Verfahren.

Vör den Aukschoonstermin

De Rechtspleger kann nah egen Meenen öberslahn, wat för’n Verkehrsweert de Immobilie hett. Normalerwies warrt aber en Sachverstännigen beupdragt, dat he en Gootachten öber den Verkehrsweert upstellen schall. Wenn al en Gootachten vörliggt, denn is dat ok möglich, dat dat denn to Grunn leggt warrt bi dat Faststellen vun den Verkehrsweert.

Wenn dat so wiet is, denn warrt düt Gootachten al Lüde tostellt, de wat mit dat Verfahren to kriegen hefft un de Weert warrt bekannt maakt. Jedereen kann dor denn wat to seggen.

Wenn al anhöört wurrn sünd, denn warrt de Verkehrsweert mit en Besluss fastleggt. Gegen düssen besluss könnt al mit Hölp vun en Beswaar gegenan gahn.

Wenn de Verkehrsweert denn endgüllig fastsett wurrn is, denn warrt de Termin vun de Aukschoon bestimmt. Normalerwies duurt dat 9 bit 12 Monaat vun den Dag af an, wo de Dwangsaukschoon anordent wurrn is bit to dat Bestimmen vun den Termin vun de Aukschoon. Dat kann aber ok mol 24 Monaat duurn. De Termin warrt in’t Amtsgericht mit en Zeddel bekannt maakt un in dat Amtsblatt afdruckt. Ok in dat Dagblatt un in’t Internet kann dat kunnig maakt weern.

Aukschoonstermin

In den Aukschoonstermin warrt dat „minnst Geboot“ upstellt. Dor sünd de Rechten in, de bestahn blievt vunwegen en vörrangigen Indrag in dat Grundbook un de Deel, de boor betahlt weern mutt. Dat sünd tomeist de Kosten för dat verfahren vun de Aukschoon, faken kaamt dor denn ok noch Lasten hento, de vun staatswegen anfallt (as Grundstüürn) un wat suß noch an de Rechten hangt, de bestahn blievt.

De minnste Tiet, in de in en Aukschoonstermin de Geboden afgeben weern köönt, is 30 Minuten. Fröher weer dat möglich, tominnst een Stunn lang Geboden aftogeben.

De wat to kriegen hett oder jede annere, de dor dat Recht to hett (as de Schulliger) kann to sien Sekerjeit en Afslag vun 10 % vun den Verkehrsweert verlangen. Düsse Sekerheit kann bibröcht weern mit Hölp vun en Scheck, de vun de Bundesbank pröövt wurrn is, oder mit en Scheck to’n Vereken, de vun een Kreditinstitut utstellt wurrn is, wat dor för tolaten is oder vunwegen dat Verklaren vun de Börgschup vun so en Institut. Bloß bit to’n 15. Februar 2007 is dat ok möglich, düsse Sekerheit dör dat Övergeven vun baar Geld in den Termin bitobringen. Vun den Dag af an mutt dat Geld up en Konto vun de Gerichtskass öberwiest weern. Wenn dat beste Geboot, dat in den Termin afgeben wurrn is (Meistgeboot) ünner 7/10 vun den Verkehrsweert liggt, mutt de Toslag aflehnt weern, wenn een dat verlangt, de dor dat Recht to hett. Wenn dat meistgeboot ünner de Hälft vun den Verkehrsweert liggt, mutt de Toslag vun Amts wegen aflehnt weern. Wenn dat so kümmt, mutt en neen Termin fastleggt weern. Dor gellt düsse Grenzen denn nich mehr. Wenn bi en Aukschoonstermin keen geboot afgeben warrt oder wenn de Toslag nich geben warrt, vunwegen dat de, de wat to kriegen hett, inverstahn is mit dat Instellen vun dat Verfahren, denn blievt düsse Grenzen ok bi den neegsten Termin bestahn. Wenn twee terminen ohn Geboot afhollen wurrn sünd, denn mutt dat Verfahren afbraken weern.

De wat to kriegen hett (Gläubiger) kann to jede Tiet seggen, dat dat verfahren instellt weern schall, egol, wie hooch dat Geboot is.

Ob en Toslag geben oder aflehnt warrt, beslutt dat Gericht.