Edward Adrian Wilson
Edward Adrian Wilson (* 23. Juli 1872 bi Cheltenham; † 29. März 1912, Ross-Schelfies, Antarktis) weer en engelsch Polarforscher, Dokter un Ornitholoog.
Boren un upwussen is he up de Crippetts Farm dicht bi Cheltenham, Gloucestershire. He studeer an dat Gonville and Caius College vun de Universität Cambridge. Dor wurrd noch immer sien College-Fahn upbewohrt, de Wilson mit to’n Süüdpool führt hett. He weer de tweete Söhn vun fiev Kinner vun den Dokter Edward Thomas Wilson (1832–1918) un sien Fru Mary Agnes, boren Whishaw (1841–1930). He sülvst hett sien Afsluss 1900 maakt. Siet 1901 weer he mit Oriana Souper verheiraadt.
Deelnehmer an britisch Antarktis-Expeditschonen
ännernWilson weer Deelnehmer vun twee britisch Antarktis-Expeditschonen. Wiels de Discovery-Expeditschoon van 1901 bit 1904 ünner Robert Falcon Scott up de Discovery hett he as Dokter un Zooloog arbeit. Ernest Shackleton hett hüm ansluutend anboden, dat he an sien Nimrod-Expeditschoon (1907–1909) deelnehmen kunn, wat Wilson aber aflehnt hett.
Wilson weer denn aber weer Deelnehmer vun de Terra-Nova-Expeditschoon, de 1910 ünner Scott to de Antarktis upbreken dee un Wilson weer dorbi för den wetenschaplich Deel verantwortlich. 1911 hett he dorbi de so nömmt Winter-Reis ünnernommen, gemeensam mit Henry Robertson Bowers un Apsley Cherry-Garrard, to de Brööt-Rebeeden vun Königs-Pinguine up Cape Crozier, üm dor Eier för wetenschaplich Studien to sammeln. De Reis funn bi Dunkelheit statt und weer woll bannig hart. Cherry-Garrard schreev dorto dat Book: Die schlimmste Reise der Welt.
Wilson weer ansluutend een vun de fiev Mannlüüd, de an’ 18. Januar 1912 den Süüdpool recken deen, aber Roald Amundsen un sien Lüüd weern de Eersten dor ween. De Rücktour hebbt de Briten denn nich mehr schafft, se sünd all to Dood kommen.
Wilson weer in en stark religiöös präägt Atmosphäre upwussen un he behull bit to sien Dood en spirituelle Heiterkeit un Gelaatenheit, de hüm wiels sien Deelnahm an de Antarktisexpeditschonen to de Person wurrn leet, an de sück sien Kameraden wennd hebbt, ween se Tospröök bruuken deen. In de Utnannersetten tüschen Scott un Shackleton över vermeentlich Vörrechtsfragen to de Eroberung vun den Süüdpool hett he sück up Scott sien Siet slahn. Dordör keem dat in de Folg to’n Bröök mit de hüm eegentlich früendlich verbunnen Shackleton.
Literatur
ännern- Apsley Cherry-Garrard: Die schlimmste Reise der Welt. Semele Verlag, Berlin 2006, ISBN 3-938869-04-6
Weblenken
ännern
Edward Adrian Wilson. Mehr Biller, Videos oder Audiodateien to’t Thema gifft dat bi Wikimedia Commons.