As Eenheitenteken warrt de Afkötten betekend, de an de Steed vun den vullstännigen Naam vun en Eenheit bruukt warrt un de tohopen mit den as Maattall betekenten Tallenweert en physikaalsch Grött beschrieven deit. De Toorden vun en Maateenheit to en physikaalsch Phänomen warrt in Eenheitensystemen fastleggt. In de meisten Staaten un Länner warrt dorvör dat SI-Eenheitensystem bruukt.

To’n Verdüdlichen de physikaalsch Grött Luftdruck as Bispeel. De Grött sülvst warrt mit dat Formelteken p afkött un in de Eenheit Pascal meten, wovun dat Eenheitenteken Pa is. Hebbt wi an een sünnerlichen Oort en Luftdruck vun 1020 Pascal, sütt dat in en Formel so ut:

p = 1020 Pa

Wobi p dat Formelteken för den Druck is, de Tall 1020 de Maattall angifft un Pa dat Eenheitenteken dorstellt.

Dat Eenheitenteken steiht jümers achter de Maattaal un warrt dör en schuult Leerteken vun de all trennt. Utnahmen dorvun sünd de Eenheitenteken för de Gradindelen °, un ′′, de jümmers direkt blang de Tall staht.