Eerdpüüster
De Eerdpüüster (wetenschoplich Salamandra salamandra), ok Mull oder Füersalamander nömmt, is en Deert, dat to de Amphibien un dor to de Salamanders höört.
| Eerdpüüster | ||||||||||||
|---|---|---|---|---|---|---|---|---|---|---|---|---|
 | ||||||||||||
| Systematik | ||||||||||||
| ||||||||||||
| Wetenschoplich Naam | ||||||||||||
| Salamandra salamandra | ||||||||||||
| Linnaeus, 1758 |
Utsehn
ännernDe Eerdpüüster is swart mit gele Placken oder Bänner. De Ünneroorden ünnerscheedt sik faken bi dat Utsehn. He warrt üm un bi 23 Zentimeter lang un bringt denn so üm un bi 40 Gramm op de Waag.
Levensruum
ännern
De Eerdpüüster leevt in grote Delen vun Süüd- un Middeleuropa. In Noorddüütschland leevt he in den Hoort, de Lünborger Heid un ans blots in en poor lüttjere Rebeden. Normalerwies leevt he aver lever in ene Hööch vun 200 bet 450 Meter över de See.
He leevt in Bült- und Bargland mit Woolden. Opleevst mag he fuchtige Mischwoolden. Nadelbööm mag he weniger. Den Dag över krüüpt de Eerdpüüsters in Ecken, wo se schütt sünd, ünner Steen, in Eerdgäng vun annere Deerten oder twischen Boomwuddeln to’n Bispeel. Rutkamen doot se dor meist blots bi Nacht oder wenn dat düchtig regent hett.
De Oort warrt in 13 Ünneroorden indeelt:
- Salamandra salamandra almanzoris
- Salamandra salamandra bejarae
- Salamandra salamandra bernardezi
- Salamandra salamandra beschkovi
- Salamandra salamandra crespoi
- Salamandra salamandra fastuosa
- Salamandra salamandra gallaica
- Salamandra salamandra gigliolii
- Salamandra salamandra longirostris
- Salamandra salamandra morenica
- Salamandra salamandra salamandra
- Salamandra salamandra terrestris
Dree annere Ünneroorden warrt na geneetsche Ünnersökungen nu as egene Oorden ansehn. Dat sünd de Korsische Eerdpüüster (Salamandra corsica Savi, 1838), de Noordafrikaansche Eerdpüüster (Salamandra algira Bedriaga, 1883), de Süüdspaansche Eerdpüüster (Salamandra longirostris Joger & Steinfartz, 1994) un de Kleenasiaatsche Eerdpüüster (Salamandra infraimmaculata Martens, 1885).
Levenswies
ännernPooren doot de Eerdpüüsters sik in de Tiet vun April bet September. De Larven wasst denn bet to’t Vörjohr in’n Buuk vun de Mudder. Denn warrt se vun de Mudder in enen Diek oder Pool afsett. Dat sünd in’n Dörsnitt üm un bi 30 Stück opmal. Dor wasst se ran, bet se twee bet veer Johren oolt sünd. Denn sünd se sülvst sowiet, dat se sik pooren köönt.
Freten doot se Kevers, Snicken, Mecken un annere lütte Deerten.
De Eerdpüüsters köönt 20 Johren oolt warrn. Welk sünd ok al över 50 Johren oolt worrn.
