Dat Huus vun de Eurypontiden weer een vun de beiden Hüser vun de Königen vun Sparta. Se hefft en Mann mit Naam „Prokles“ an jem ehrn Vörvadder ankeken. Düsse Prokles schall na de greeksche Mythologie ut Herakles siene Familie afstammen. In de Politik vun Sparta spelen de Eurypontiden meist en ringere Rull, as de Vetreder vun dat annere Huus, de Agiaden. Man mit de Johrhunnerten, un sunnerlich, as Sparta na den Peloponnes'schen Krieg gegen Athen in Grekenland dat Seggen harrt hett, änner sik dor wat an un ok de Eurypontiden spelen en besunnere Rull in dat Speel vun de Mächt in Sparta. De gröttsten Königen ut düt Huus sünd woll Archidamos II. un sien Söhn Agesilaos II., de up Sparta siene Politik en duerhaftigen Infloot utöövt hefft.