Hauptmenü öffnen

Wikipedia β

Koortenutsnidd mit de Fähr Brobargen
Brobargen, Blick op de Oost mit de Prahmfähr
Brobergen, Blick op de Fähr

De Fähr Brobargen (döfft op’n Naam Helmut Hudaff) is en Prahmfähr över de ünnere Oost, de dat Dörp Brobargen op dat rechte Över mit’n Höben un de Lännereen op dat linke Över verbinnt, de ok to Brobargen tohören doot. De nächsten Dörper op dat linke Över sünd Oostendörp, Hollen un Nindörp bi Loomst.

Fröher weer de Fähr för de Bueree un den Hannel un Verkehr twüschen de Dörper an de Oost dor. Vondaag is de Prahm för de Bueree nich mehr wichtig. De Fähr föhrt nu vör allen Touristen un Utflöglers. Dat is en Statschoon von de Düütsche Fährstraat.

De Fähr löppt blots in’n Sommer von Anfang Mai bet Enn September. In’n Mai un September föhrt se alldaags von Klock een namiddags bet Klock söss un Wekenenns von Klock teihn morgens bet Klock söss. In’n Juni, Juli un August föhrt se jeden Dag von Klock teihn morgens bet Klock söss.

Fröher hebbt en ganze Reeg Fähren an de Oost de beiden Övers verbunnen. Vondaag is blangen de Fähr in Brobargen blots noch de Fähr Gröpel nableven.

Inholtsverteken

HistorieÄnnern

Üm 1280 hebbt de Eddellüüd von Brobargen an de Oost en Borg boot. Över de Oost hett dat en Togbrügg geven.[1] De Brügg is in’n Dörtigjohrigen Krieg verswunnen. An de Steed von de Borg stünn denn dat Good Brobargen, dat üm 1840 rüm von de Brobarger Buurn köfft worrn is. De Buurn weren denn in en Realverband tohoopslaten, de ok Besitter von de Fähr weer. Een von jem hett in dat Goodshuus wahnt un weer Fährmann. Von de Königliche Landdrostie in Stood kreeg he en inschränkte Schankgenehmigung, de blots för dat Verköstigen von de Lüüd gellen dee, de de Fähr bruukt hebbt.

1941 weer dat Goodshuus so brockfällig, dat dat afreten worrn is. 15 Johr hett dat keen Fährhuus geven. Eerst as 1956 dat Schöppwark an de Meh boot worrn is, is an de Steed von dat ole Goodshuus ok wedder en Huus boot worrn. De Bewahner von düt Huus weer Gastweert, Fährmann un hett dat Schöppwark un de Slüüs an de Meh bedeent. He harr free Loschie in dat Huus un hett ok noch en Deputat von Roggen, Kartuffeln, Steekröven, Stroh un Törf kregen.

In de Johren 1970 is de hüdige Fähr köfft worrn. As de Prahm na Brobargen överföhrt worrn is, weer störmsch Weder un de Fähr is afdreven un in Blomendol an’t Över dreven. Üm un bi teihn Johr later kreeg de Fähr ok Verlööv Touristen över de Oost to föhren.

 
Logo von’n Fährvereen

2006 weer de Oostdiekverband dorbi, Plaans to maken för den Diekneebo an dat linke Över von de Oost bi Brobargen. De Verband harr dorbi toeerst den Plaan, den kumpletten Bagen, in den de Höben liggt, na butendieks to leggen. De Diek schull nich den Bagen nehmen, man in grade Lien na de Meh un dat Meh-Schöppwark lopen. Dat Huus op’n Höben schull afreten warrn un de Fähr verswinnen. Dat harr Köstengrünn aver schull de Oost ok mehr Ruum to’n Utbreden bi Hoogwater beden (in’n Rahmen von de Diekboarbeiden sünd dorför langs de Oost en Reeg Pütten anleggt worrn).

Üm dat to verhinnern is an’n 28. März 2007 de Fährvereen grünnt worrn, de sik dor för insetten wull, de Fähr un dat histoorsche Arv von Brobargen to bewohren.[2], De Vereen hett de Fähr un dat Gasthuus von’n Realverband pacht un en Reeg Maten von’n Vereen hebbt vör dat Water- un Schippfohrtsamt Cuxhoben en Fähr-Föhrerschien maakt.[3] De Diekverband hett inlenkt un dat Rebeed nich utdiekt.

In’n Januar 2010 hett de Fährvereen de Fähr för en symboolschen Pries von een Euro von’n Realverband köfft.

FährÄnnern

De Prahmfähr Brobargen is 1924 in’n Opdrag von dat Waterboamt Stood as Bonummer 214 von de Schippbo-Sellschop Ünnerwerser A.G. in Bremerhoben as handtagen Seilfähr boot worrn. Se is 17,90 m lang, 5,45 m breed, hett en Draagfähigkeit von 10 Tunnen un is för 30 Personen tolaten. 1926 hett de Fähr en Motoor von’n Typ Deutz A2L 514 kregen, de dat Seil över en Winn tüht.[4]

De Fähr is von 1924 bet 1945 as Fähr Geversdörp in Geversdörp över de Oost föhrt un denn von 1945 bet 1951 in Sethlerhemm bi Basbeek (bedreven von Lühmann). Von 1956 bet 1961 is se noch wedder in Sethlerhemm lopen, nu bedreven von Friedrich Keller. Von 1961 bet 1972 hett de Fähr as Reserveprahm in Geversdörp legen. In’n Januar 1973 hett de Realverband Brobargen de Fähr köfft un ehr na Brobargen överföhrt.

Nadem de Fährvereen de Fähr von’n Realverband övernahmen hett, is se op’n Naam Helmut Hudaff döfft worrn. De Fähr harr vörher keen egen Naam. De Naam ehrt den Vörsitter von’n Realverband un Ehrenbörgermeester Helmut Hudaff.

WeblenkenÄnnern

  Fähr Brobargen. Mehr Biller, Videos oder Audiodateien to’t Thema gifft dat bi Wikimedia Commons.

FootnotenÄnnern

  1. Die Burg Brobergen, Fähr- un Geschichtsvereen Brobargen
  2. Fährverein, Fähr- un Geschichtsvereen Brobargen
  3. Adolf Brockmann: Oste-Fähre: Vier Fährleute, Hamburger Abendblatt, 21. November 2007.
  4. Fähr Brobargen, Binnenschipperforum.


Koordinaten:53° 36′ N, 9° 10′ O