Föhren

De Föhren / Fuhren of Groffdaennen (latiensch: Pinus) sünd en Geslecht vun Nadelbööm (Pinophyta) in de Familie vun de Pinaceae (Föhrenfamilie).

Föhren

Systematik

Afdeel:	Nadelbööm (Pinophyta)
Klass:	Pinopsida
Ornen:	Pinales (Föhrenoordige)
Familie:	Pinaceae (Föhrenfamilie)
Ünnerfamilie:	Pinoideae
Geslecht:	Föhren

Wetenschoplich Naam

Pinus

Linnaeus

Kortspranten mit jemehr Nadels op en Twieg

Vörkamen

De Föhren sünd vör allen op de Noordhalvkugel vun de Eer tohuus. Se möögt de köhl-fuchten Klimarebeden, se hebbt aber ok subtroopsche un troopsche Rebeden besiedelt. Vundaag warrt se weltwiet anboot.

Beschrieven

De mehrsten Föhrenoorden wasst as Bööm, ’n poor ok as Strüker. Föhren sünd ümmergröön. Vergleken gegen de anneren Nadelboomgeslechter sünd ehr Nadels besünners lang. Se staht (je na Oort) in Büschel vun twee, dree oder fief op Kortspranten, de vun de Twiegen afgaht (Rechts gifft dat ’n Bild dorvun). Bi Fichten un Dannen staht de Nadels enkelt direktemang op den Twieg.

Weertschopliche Bedüden

Weltwiet sünd de Föhren de wichtigsten Boomoorden för de Forstweertschop. Se verlangt nich veel un wasst goot. Un so warrt se faken an de Steed vun inheemsche Boomoorden anplant, to’n Bispeel wenn de Woold raadt oder afbrennt is. Sogor in de Tropen un Subtropen warrt se in Holtplantaschen anboot. Ok in’t Middelmeerrebeet gifft dat grote Föhrenplantaschen, mehr as disse Bööm in de Natuur vörkummt, tomehrst as Monokultur. För den Bodden is dat op de Duur nich goot.

Dat Föhrenholt is licht un riek an Kien. Dat warrt as Boholt, för den Innenutbo, as Möbelholt un as Papeer bruukt.

Bi welke Föhrenoorden is de Saat so groot, dat een de eten kann (Pinienkarns).

Systematik

Dat Föhrengeslecht (Pinus) warrt in dree Ünnergeslechter (subgenus) ünnerdeelt:

Ducampopinus
Strobus
Pinus

Disse dree Ünnergeslechter hebbt tosamen üm un bi 115 Föhrenoorden.

Naam

Dat Woort Föhr gifft dat in meist all de germaanschen Spraken, to’n Bispeel ingelsch fir. Dat Hoochdüütsche Kiefer is ut Kien-Föhre tosamentrocken. Kien is dat Boomhoorz vun de Föhr.

Föhren. Mehr Biller, Videos oder Audiodateien to’t Thema gifft dat bi Wikimedia Commons.