Fachhoochschool Noordoostneddersassen
De Fachhoochschool Noordoostneddersassen (FH NON) weer en staatliche Fachhoochschool in Neddersassen, de von 1971 bet 2005 bestahn hett.
Historie
ännernDe Fachhoochschool is 1971 grünnt worrn. In ehr sünd de Staatliche Inschenörakademie för Waterweertschop un Kulturtechnik in Seborg un de Staatliche Inschenörakademie för Bowesen in Buxthu tohoopfaat worrn.
Seet weer na 1971 toeerst Buxthu. In de Johren 1970 hett dat Plaans geven in Lümborg en Gesamthoochschool to grünnen. Dorüm sünd 1978 in Lümborg de Fachbereiche Sozialwesen un Weertschop von de FH NON grünnt worrn un 1981 is denn ok de Verwaltung von de Hoochschool na Lümborg leggt worrn. Mit dat Wintersemester in’n September 1992 is ok de grundstännige Studiengang Angewandte Automatisierungstechnik von’n nee grünnten Fachbereich Automatisierungstechnik inricht worrn. De schull dat inschenörwetenschopliche Angebot von de Fachhoochschool an’n Standoort Lümborg grötter maken un de Bedrievsweertschop un Weertschopsinformatik ergänzen. Toletzt (Wintersemester 2004/2005) weren 4.271 Studenten an de FH NON inschreven, dorvon 587 in Buxthu, 3200 in Lümborg un 484 in Seborg.[1]
De Landsregerung un de Landdag von Neddersassen hebbt denn aver beslaten, dat de FH NON in’n Januar 2005 mit de Universität Lümborg tohoopslaten warrt. De Standoort Buxthu is aver in de private Hoochschool 21 ümwannelt worrn. De Standoort Seborg is von de Universität Lümborg 2009 an de Oostfalia Hoochschool för angewandte Wetenschoppen afgeven worrn.