Falkland-Bootaante
De Falkland-Bootaant (Tachyeres brachypterus) en Vagel, de to de Bootaanten to rekent warrt. Dor höört he mit to de Halfgöse (Tadorninae) to. Bi düsse Aart hannelt sik dat um en groten Aantenvagel, de na de Göse sleiht. Dat Lief is stebig un alltohopen is de Bootaante bannig dunker. Düsse Bootaante gifft dat bloß man up de Falklandinseln.
| Falkland-Bootaante | ||||||||||||||||
|---|---|---|---|---|---|---|---|---|---|---|---|---|---|---|---|---|
 | ||||||||||||||||
| Systematik | ||||||||||||||||
| ||||||||||||||||
| Wetenschoplich Naam | ||||||||||||||||
| Tachyeres brachypterus | ||||||||||||||||
| Latham, 1790 |
Wie se utsütt
ännernDe Aart hett en Lief vun 61 bit 74 Zentimeter Längde un wiggt 3,4 bit 4,42 Kilogramm. De Waart driggt en dunker Fedderkleed, bloß man an’n Buuk un mit sien Spegel an de Flunken is he witt. An’n Kopp hett he graue Feddern, unnen an’n Hals is he towielen licht bruun. De Snavel is orange mit en swatte Spitz. Bi dat Seken is de Snavel geel. Butendem sünd de Aanten meist düütlich lüttjer, as de Waarten un hefft en brunen Kopp, mit just achter dat Oge en korten witten Striepen. Dör’nanner kriegen kann een de Falkland-Bootaante mit de Langflunken-Bootaante, man de Falkland-Bootaante is grötter un stebiger.
Wie se leven un wo se vörkamen deit
ännernDe Falkland-Bootaante leevt bloß man up de Falklandinseln. Dor leevt se dat ganze Johr an de Felsenküst. An’n leevsten mag se Buchten in de See, de en beten wat ruhiger sünd un Stäen, wo oorntlich Kelp wassen deit. Bit dree Kilometer rut in de See is se to finnen. [1] In dat Binnenland is se bit 5 km af vun de Küst to finnen. Up de Eilannen kummt se in veel Gemarken faken vör un dat gifft dor bannig veel vun düsse Aart. [2] Se leevt in Soltwater , man bruukt ok Söötwater to’n Swemmen un Drinken, wenn dat nich to wiet af vun de Küst is. Falkland-Bootaanten hefft en Revier un verdedigt dat ok dat ganze Johr lang gegen annere Vagelaarden un gegen annere Poore vun de egene Aart.[3] Se freet Kreeftdeerter un Weekdeerter ut de See un kriggt de bi’t Dükern oder Grünneln to faat. Bröden deit se normolerwiese twüschen September un Dezember, nich wiet af vun dat Water, man nich in Kolonien, man jummers bloß enkelte Poore. Se brott twuschen dichte Planten, man ok in vörmolige Brödelkuhlen vun Pinguine. De Aante leggt 5-10 Eier un sitt dor denn to’n Bröden 28-40 Dage up. In de rödeltied is de Vagel butendematen aggressiv un verdeffendeert sien Revier. Falkland-Bootaanten, de noch keen Nakamen heben könnt, finnt sik in lüttje Gruppen tohopen un sünd denn hen un wenn ok mol mit Langflunken-Bootaanten tosamen.
Bestand
ännernUp de Rode List vun den IUCN steiht de Falkland-Bootaante unner den Status „gor keen Sorgen“ (least concern)
Literatur
ännern- Josep del Hoyo, Andrew Elliot, Jordi Sargatal: Handbook of the birds of the world- Volume 1, Ostrich to Ducks. - Lynx Edicions, Barcelona, 1992. ISBN 84-87334-10-5
- Hadoram Shirihai: A Complete Guide to Antarctic Wildlife - The Birds and Marine Mammals of the Antarctic Continent and Southern Ocean, Alula Press, Degerby 2002, ISBN 951-98947-0-5
- Robin und Anne Woods: Atlas of Breeding Birds of the Falkland Islands, Anthony Nelson, Shorpshire 1997, ISBN 0904614-60-3