Ferdinand Wattenberg

Rudolph Ferdinand Wattenberg (* 15. August 1823 in Rodenborg; † 2. Juni 1894 ok dor) weer en düütschen Politiker.

Wattenberg is 1823 as Söhn von Dorothea Elisabeth, borene Bansen (1801–3. Februar 1845; Dochter von Johann Ludolph Bansen), un den Aftheker Adolph Friedrich Wattenberg (13. Januar 1787–3. Februar 1848) in Rodenborg boren un dor an’n 10. September döfft worrn.[1]

He weer Aftheker in de Ole Aftheek in Rodenborg, de he 1877 an’n Aftheker Polemann verköfft hett. 1840 hett he ut de Elvmasch bi Wuhlenborg Schachblomen mitbröcht un bi Rodenborg in dat Rebeed twüschen Rodau un Wiedau inplant. Dor wasst vondaag noch Schachblomen, de ans in düsse Gegend nich vörkamen doot.

Wattenberg weer Vertreder in de Landschop von de Hartogdömer Bremen un Veern. Nadem Rudolf Kropp 1884 doodbleven is, hett dat in’n Wahlkreis Hannover 36 (Rodenborg, Zeven) an’n 18. März 1884 en Nawahl geven. De Wahl hett Wattenberg mit 57,3 % von de Stimmen wunnen. He is för de Natschonalliberale Partei in dat Aforntenhuus intagen un dat bet to de Wahl 1893 bleven. In’n 1885 nee billten Wahlkreis Stood 6 (Rodenborg, Veern) is he bi de Wahl 1885 mit 75,9 % von de Stimmen wedderwählt worrn un bi de Wahl 1888 mit 98,8 %.

Wattenberg hett an’n 12. Juni 1851 in de St.-Petri-Kark in Bremen Antoinette Elise Mathilde Güldener (üm 1831–15. Oktober 1911) freet.[1] De beiden harrn de Kinner Carl Rudolph Hermann (* 5. Juni 1852), Minna Elise Lilli (* 11. Dezember 1854), Diedrich Albert Ludolph Oskar (* 18. Januar 1857) un Amalia Minna Helena Auguste Marie (28. Oktober 1864–23. Januar 1865).[1] He is an’n 2. Juni 1894 in Rodenborg doodbleven un dor an’n 6. Juni begraven worrn.[1]

FootnotenÄnnern

  1. a b c d Indrag to Wattenberg bi genealogy.net