Fettercairn (Brenneree)

Fettercairn is en Whisky-Brenneree in Laurencekirk, Aberdeenshire, Schottland.

Fettercairn
Brenneree Fettercairn
Land	Schottland
Region	Highlands
Tyyp	Malt
Status	aktiv
Besitter	The UB Group
Grünnt	1824
Grünner	Alexander Ramsay
Washstill(s)	2 × 13.000 l
Spiritstill(s)	1 × 13.500 l, 1 × 11.500 l
Produkschoonsvolumen	1.600.000 l

Historie

De Brenneree is in’t Johr 1824 vun Sir Alexander Ramsay grünnt worrn. Se weer de tweete Destille, de en offizielle Lizenz to’n Brennen vun Whisky kregen hett – de eerste güng an de Brenneree Glenlivet. Mit de Tiet hett de Brenneree faken den Besitter wesselt. Ünner annern höör de Brenneree ok mol Sir Thomas Gladstone, den Broder vun den dormoligen britischen Premierminister William Ewart Gladstone^[1].

Na en Füür is de Destille twüschen 1887 un 1890 meist vullstännig nee opboet worrn. 1960 weer de egenen Moltboddens dicht maakt, de Tall vun de Brennblasen weer 1966 denn aver vun twee op veer vergröttert. Siet 1973 höört Fettercairn to Whyte & Mackay, de 2007 för 595 Millionen £ vun United Spirits Limited, en Dochter vun de indischen The UB Group opköfft worrn is^[2].

Produkschoon

Opfohrt na de Brenneree

De Brenneree Fettercairn höört to dat Whisky-Rebeet Highlands. Dat Water för de Produkschoon kummt ut twee Borns in de Cairngorms. In de Brennereee gifft dat en Meeschfatt (mash tun) vun 4,6 Tunnen un acht Gäärfatten to 26.000 l ut Douglasienholt. Destilleert warrn in twee Wash stills vun jeedeen 13.000 l un twee Spirit stills vun 13.500 un 11.500 l^[3]^[4].

Kiek ok

List vun de schottischen Brennereen

Literatur

Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
Walter Schobert: Das Whiskylexikon. Fischer Taschenbuch Verlag, Frankfort an’n Main, 2003, ISBN 978-3-596-15868-3.