Fingerring

En Fingerring is en Ring ut en nich verformbor Material, de vun Minschen as Smuck üm dat drütte Lidd vun de Fingers dragen warrt. Na dat Dregen vun den Ehring an den tweten Finger (tellt vun de den Duum afwannte Siet) heet disse Finger ok Ringfinger. Annere Ringformen warrt aver ok an annere Fingers as den Ringfinger dragen.

Dat lett so, as wenn disse Artikel nich so akraat is as de ween schull.

Kiek up Wikipedia:Pleeg, daar to diskuteren, wat verbetert oder ännert warrn mott.

Bedüden

Blangen de Opgaav as Smuck harrn de Ringen faken symboolsch Bedüden un hebbt na buten Egenschoppen vun den Dreger wiest. Eh- un Verlovungsring wiest, dat de Dreger vergeven is. Ok de Hirtenring vun Karkenlüüd hett desülve Opgaav, un wiest, dat de Dreger sik mit de Kark verbunnen hett. Meesterschopsringen warrt faken in Noordamerika dragen un wiest dat de Dreger to ene Sportmannschop tohören dee, de Meester worrn is. Den hogen symboolschen Weert vun Ringen wiest ok dat Motiv vun den Töverring in de Mythologie un Literatur.

Welk Ringtypen hebbt ok ganz praktische Opgaven. Blangen Armbanduhren gifft dat ok Ringuhren. De Giftring, in den ene lütte Portschoon Gift opbewohrt warrn kann, is siet de Antike bekannt. Segelringen kunnen as Segel bruukt warrn.

Historie

De öllsten bekannten Fingerringen sünd de Mammutelfenbeen-Ringen ut Pavlov in Tschechien, de vör üm un bi 21.000 maakt worrn sünd.

Fingerringgrötten

Dat gifft verschedene Methoden Ringgrötten antogeven. Dat Wiener Verenigungsmaat (na ISO 8653:1986) gifft den Fingerümfang in Millimeter an. Dat Maat vun Frankriek maakt dat sülve, tüht aver vun de Tall 40 af. Dat kuum mehr bruukte Pacher Maat fangt bi 38,5 Millimeter Ümfang mit ene Grött vun 1 an. Denn warrt jede högere Nummer üm 1,85 Millimeter grötter. Dat Dörmetermaat gifft nich den Ümfang an, dat gifft den Dörmeter an. De Weert is also Ümfang deelt dör Pi (≈3,14). Dat Maat vun England, Irland un Australien arbeidt nich mit Tallen. Dor gifft dat Bookstaven. För den Fingerümfang 37,8 Millimeter warrt de Bookstaav A bruukt, denn geiht dat in’t Alphabet för je 1,3 Millimeter jümmer een Bookstaav höger. Bi dat Maat in de USA un in Kanada is en Ümfang vun 36,5 Millimeter de Grött 0. Denn warrt mit je 0,032 Inch (0,8128 Millimeter) Ümfang de Grött üm een grötter.