Flagg vun Hamborg

Hamborg hett dree verscheeden Flaggen, de Landsflagg, de Staatsflagg un den Stander.

Landsflagg

Landsflagg

De Landesflagg, de vun de Börger free in Gebrukk ween dröfft, wiest de witt Borg vun dat Wappen vun Hamborg up rooden Grund. De Grundfarven entspreken den Farven vun de Hanse.

Entstahn

All in dat Johr 1270 hett dat Stadtrecht vörschreven, dat de Scheep vun de Börger en rooden Flögel (vlugher) führen sullen. Dat is dormit dat öldste bekannte Gesett över dat Führen vun Flaggen up Scheep överhoopt. Bit to dat Stadtrecht vun 1605 wurr dat mehrfack nee bestimmt. Disse Flögel oder latere Wimpel wurr an de Tipp vun de Masten vun en Schipp führt, un later ok deelwies dör Standarten oder Schiller an de Bordwanden mit dat Stadtwappen ergänzt. Sluutend hett man ok dat Wappen sülvst, also de root Borg up witt Schild, up dat root Flaggendook, infügt. In dat 17. Johrhunnert gung de Eenheitlichkeit vun de Flaggenführung verloren un de root Borg wurr up witt Flaggendook oder up en root Dook en witt Borg dorstellt. Dorto keemen verscheeden blau Varianten mit de ünnerscheedlichst Formen vun de Borg.

En 1727 vun Senater Herman Langenbeck (1668–1729) verfaat seerechtlich Kommentar to dat Stadtrecht vun 1605 stell tomindst de old Eenheitlichkeit up de Scheep vun den Hamborger staat wedder her. So schrifft he: „Auf unseren Convoyen ist der Wimpel roht, wie auch die große Flagge von hinten, auch ist das Goßgen […] roht, und das Hamburger Wapen weiß, solte Silber seyn, im rohten Felde […]. In der Admiralitätsflagge ist das Wapen auf das Mittel eines Ankers gesetzet.“ Dat Dörnanner in de Hannelsflott bleev aber bestahn. An' 14. Mai 1751 hett de Senat ut Anlaat vun en Freeden-, Hannel- un Schippfohrtverdrag mit Algier beslooten, dat de Börger vun de Stadt „auf ihren Schiffen einen rothen Flüger und rothe Flagge mit einem weißen Stadtwappen zu führen gehalten sind“. Todem wurr en Muster up en Blicktafel fertigt un an de Börse utstellt, dat nah eenig Inwänden nochmals ännert un in' Juni 1751 genehmigt wurr. Aber ok disse Besluss wuur trotz androhnt Straaf överwegend nich dörführt, wiel Kontorflaggen noch unbekannt weern un de Kooplüüd un Reeder versöcht hemm, sück dör Flaggenvarianten vunnanner aftogrenzen. Wiels de Franzosentiet in Hamborg, wurr de Flagge vun Frankriek uptrucken, de Haben ahnhen dör de engelsch Blockaad versloossen.

1829 keem dat to nee Verhanneln mit Algier un Marokko, wielsdessen dat siedens de Free Hansestäder Hamborg, Lübeck und Bremen för en körten Tiet Överlegungen to en gemeensam Hannelsflagg geev. Mit Senatsbesluss van' 19. Dezember 1829 wurr aber weer de eegen Flagg fastleggt, de up dat Muster van 1751 grünnen deen. Wiel de Verhanneln mit Algier un Marokko scheitern deen, wurr de Flaggenfraag eerst 1834, nah Anfragen vun Russland un Holland över deren nipp un nau Form, weer upgreepen un sluutend mit dat all 1829 erstellt Muster per Senatsbesluss an' 6. Juni 1834 fastleggt.

In' Gegensatz to 1751 hett sück disse Flagg överall dörsett. Blots bi de Fier to den Uttoog ut dat old Börsengebäude 1841 sünd noch eenmal vereenzelt witt Flaagen mit root Borg to sehn ween.

Bit 1861 weer de Dorstellung vun de Borg in de Flagg noch nah dat Muster van 1751, en Borg mit apen Door un Fallgitter, mehreren Fenstern in de Toorns, ahn Krüüz un ahn Steern. Se wwer dormit en beten wat ut de Tiet kommen, tomal tovör all Wappen un Segel as ok siet 1841 de Münten vun de eegen Geldsoort (Courantmark) den middelöllerichen Stadtsegeln entlehnt weern. De Senat hett de Schippfohrts- un Habendeputatschoon mit en „besseren Zeichnung“ beupdragt un kreeg de Vörslag för en nee Admiralitätsflagg, de ünner Wegfall vun den Anker denn ebenfalls 1861 as Hannelsflagg annommen wurr.

De Borg ähnelt nu ok dat Vörbild vun dat old Segel un övernimmt ok de sien Krüüz un Steerns, de up all bitherig Flaggen nich updüüken deen. Sogor de ünnerscheedlich Antall vun Zinnen up beid Toorns wurrd tonächst nah Vörbild vun dat Segel upnommen. De Farv vun dat Dook wessel todem vun Purpurroot weer to en heller Root, as dat all to Tiet vun den rooden Flögel bruukt wurr.

1894 geev de Senat nochmals en nee Flaggentafel herut, bi de de Borg schmaler un höhger utfallt un mit quaderförmig andüüd Müerwark mit Rundungen dorstellt is. Letzteres full aber bi en nochmalig Överarbeiten in de 1950er Johren weer weg.

Staatsflagg

Staatsflagg – Flagg vun den Senat

De Staatsflagg (Senatsflagg) is den Senat as Staatsböverhoopt vörbehollen. Se wiest dat groot Stadtwappen mit witt Umrahmung up rooden Grund. Se wurr to dat Inweehn vun dat Hamborger Raathuus in dat Johr 1897 maakt un wurrd bi Beflaggung an dat Raathuus ut de Laube sett (an' Toorn över den Balkon). Se is dor för de Tiet vun de Senatssitzungen to sehn oder wurrn bi repräsentativ Anlaaten up Waterfohrtüüch sett, sofern Senatsliddmaaten an Bord sünd.

Stander

De Stander, en up swaart-root-golden Ünnergrund mittig anbrocht lüttgere Staatsflagg, wurrd vun den Eersten Börgermeester un den Börgerschapspräsidenten bi offiziell Staatsbesöök an't Fohrtüüch führt.