Flagg vun Neddersassen

De Flagg vun Neddersassen besteiht ut dat vun de Flagg vun de Bundsrepubliek Düütschland övernommen Swart-Root-Gold, in dat sik dat en beeten to’n Mast hen verschaaven neddersassisch Landswappen – dat Sassenross befind. De Flagg deent an Land as Lands- un ok as Deenstflagg.

Flagg vun Neddersassen
Siedenverhältnis 2:3
Deenstflagg vun Neddersassen to See
Siedenverhältnis 2:3

De Flagg wurr an’ 13. April 1951 toeerst dör de Vorläufige Niedersächsische Verfassung inföhrt, de an’ 1. Mai 1951 in Kraft treden is. De nauer Utführungen vun de Flagg sünd aber eerst siet dat Gesetz über Wappen, Flaggen und Siegel van’ 13. Oktober 1952 regelt.

De Deenstflagg to See is Landsflagg in de Form vun den Düppelstander. Annere Bundslänner bruukt to See de düütsche Natschonalflagg as Hööftflagg mit de Landsdeenstflagg an ünnerordnet Stäe. Neddersassen is dat eenzige Bundsland, dat sien Deenstflagg to See as Hööftflagg führt.

Historie ännern

Disse Flagg wurr 1951 utdacht, um för dat nah den Tweeten Weltkrieg nee enstahn Bundsland Neddersassen en neutraal Flagg to kriegen, de kien vun de vörher up dit Rebeet bestahn ehmals sülvstännig Landsdeelen Hannober, Brunswiek, Ollnborg un Schaumborg-Lippe benahdeeligt oder övervördeelt. Bit to de offiziell Inführung vun de jetzt gültig Flagg vun Neddersassen wurrn wiederhenn de in de jeweiligen Rebeeden vörher bruukt Landsflaggen ok bi offiziell Anlässen bruukt. Parallel dorto geev dat en an de welfisch-hannobersch Flagg anlehnte geel-witt-dweerstriept Flagg mit dat Landswappen in de Midden, de aver in de nich-hannobersch Landsdeelen faken up Aflehnung stött is un de ok nie offiziell as Flagg bestimmt wurr.

Hüüd hebbt de fröheren Landsflaggen vun Hannober, Brunswiek, Ollnborg un Schaumborg-Lippe immer noch – wenn ok wietgahnd blots folkloristisch – Bedüüden, bispeelswies bi Volksfesten.

Borns ännern