Flagg vun Noordkorea
De Flagg vun Noordkorea (Siedenverhältnis 1:2) wiest en roden waagrechten Striepen, de vun twee lüttje witte un twee blaue Striepen ümfaat warrt. Dat Bredenverhältnis is 6:1:22:1:6 (alltohoop 36 Eenheiten). In’e Midd vun’n roden Striepen, aver en beten wat op de linke Sied (Middelpunkt bi een Drüddel vun de vulle Breed), is en roden Steern op en witten Krink as Symbol för’n Kommunismus. De Dörmeter is 16 Eenheiten.
Flagg vun Noordkorea
De Flagg is in de Verfaten vun Noordkorea in Artikel 164 fastleggt un is an’n 8. September 1948 annahmen worrn. Dat aktuelle Flaggengesett vun Noordkorea is vun’n 22. Oktober 1992. De Noordkoreaners sülvst seggt dor op Koreaansch 인공기 (Ingonggi) to, wat en Afkörten is för Natschonalflagg vun de Demokraatsche Volksrepublik Korea (Chosŏn minjujuŭi inmin konghwaguk kukki = 조선민주주의인민공화국국기).
De Flagg vun Noordkorea weiht ok vun een vun de hööchsten Fahnenmasten op de Welt in dat Fredensdörp an de Grenz to Süüdkorea. De Mast is 160 Meter hooch un de Fahn weegt 136 Kilogramm.