Flagg vun Sudan

De Flagg vun’n Sudan is as offizielle Flagg vun den Staat Sudan an’n 20. Mai 1970 annahmen worrn. Utklamüstert worrn is se vun Abdalrahman Ahmad Aljali, de an de Kunsthoochschool studeert harr.

Flagg vun’n Sudan (Format 1:2)

Utsehn un Bedüden

De panaraabschen Klören in de Flagg dokumenteert de Anlehnen an de Araabsche Befre’ensflagg:

• Gröön steiht för den Islam, de Dynastie vun de Fatimiden un för’t Gootgahn vun’n Staat.
• Root is de Klöör vun de Revolutschoon, vun’n Sozialismus, vun’t Vörankamen un stieht för de Oppers, de de Kamp üm den Natschonalstaat köst hett.
• Witt is en Teken för Freed, Licht un Optimismus un steiht butendem för de witte Revolutschoonsflagg vun 1924 vun de Liga vun de Witten Fahn.
• Swart wiest opletzt op de Tohöörigkeit to’n „Swarten Eerddeel“ hen – dat araabsche Woort Sudan heet neemlich „swart“. Bito weer swart de Hööftklöör vun de Flagg vun Muhammad Ahmad, en sudaneeschen Volksföhrer ut dat 19. Johrhunnert, de sik sülvst as Mahdi utgeven hett.

De Spitzt vun’t gröne Dreeeck reckt to’n Drüddel vun de Flaggenläng in den witten Striepen rin.

Historie

Flagg vun’n Sudan 1956–1970
Sietenproportschoon 1:2

De Flagg is inföhrt worrn, nadem de Sudaneeschw Sozialistische Union ünner Dschafar Muhammad an-Numeiri 1969 de Macht in dat Land an sik bröcht hett. An’n 20. Mai 1970 weer se dat eerste mol offiziell bruukt. De vörige Flagg (Bild) is siet de Unafhangigkeit in’t Johr 1956 in Bruuk wesen.

Kiek ok

• Flagg vun Süüdsudan

Literatur

• Smith/Neubecker: Wappen und Flaggen aller Nationen. München 1980, ISBN 3-87045-183-1.

Weblenken

Flaggen vun’n Sudan. Mehr Biller, Videos oder Audiodateien to’t Thema gifft dat bi Wikimedia Commons.