Flathead

De Flathead sünd en Indianer-Stamm ut de Salish-Spraakgrupp (Spraakfamilie: Mosan). Se hörrt to de Binnen-Salish, de up dat Columbia-Plateau leevten. Flathead is en Naam, de in Noord- un Süüdamerika ahn speziell ethnologisch Bedüüden verwend wurrd, um Stämme to bestimmen, de den Bruuk hebbt, de Kopp in fröh Kindheit dör könstlich Middel to formen. För de Stamm Flathead is dat sogor en falschen Naam, wiels dat Plattmaken vun de Stirnpartie bi lütt Kinner, geev dat bi de gar nich. De Flathead vun de Bargregion in dat hüdige noordwestlich Montana weern de ööstlichst Stamm vun dat groote Salish-Volk, de in de Columbia- un Fraser-River-Region westwärts to’n Pazifik hen leevte.

Dat fröhere Stammrebeet vun de Flathead un Pend d’Oreille un dat Reservat in Montana vundaag

Flatheadsquaw an en Stroomloop

Flathead-Jung, Edward Curtis, 1911

An’ Anfang vun dat 19. Johrhunnert baseer ehr Levensgrundlaag vor allen up de Jagd un dat Sammeln vun wild Planten, besünners de Camaswuddel oder Knullen (Camasia esculente) de se mit Graavstöcker utgraben deen. De Flathead weern Halfnomaden, de in Veerpaal-Tipis oder mattenbedeckten Hütten wahnen denn. Se weern freedlich, un harrn mit nümms Krieg, mit Utnahm vun de mächtig Blackfoot, ehr Arzfienden. Ehr Religion weer de gewöhnlich Animismus vun de Indianer un se harrn en grooten Tall von zeremoniell Danzen, wohrschienlich hör dor ok de Sünnendanz to.

In en Kontrakt vun 1855 hebbt de Flathead en groten Deel vun hör Rebeet an de USA aftreden, kregen dorför aber süüdlich vun de Flathead Lakes en Reservatschoon, de so lütt nich weer. De Flathead-Reservatschoon (Pablo-Salish & Kootenai Reservation) in de Lake County (Montana) is hüdtodag de Heimat vun de konfördereerten Salish-, Kutenai- un Pend d'Oreille-Stammen. De Reservatschoon umfaat över 1,2 Millionen Acres (1 Acre = 4047 m² = 0.4 Hektar). Van de 7.005 indragen Stammeslidmaaten leevt ruch weg 4.500 in oder bi de Reservatschoon.

Kiek ok

• List van Indianer up de noordamerikaansche Kontinent

Literatur

• Barry M. Pritzker: A Native American Encyclopedia. History, Culture and Peoples. ISBN 0-19-513877-5
• Wolfgang Lindig und Mark Münzel: Die Indianer. Kulturen und Geschichte der Indianer Nord-, Mittel- und Südamerikas. ISBN 3-7705-1432-7
• Deward E. Walker Jr. (Rgv.): Handbook of North American Indians, Vol.12 Plateau. Smithsonian Institution Press, Washington D.C. 1998 ISBN 0-16-049514-8

Weblenken

Flathead. Mehr Biller, Videos oder Audiodateien to’t Thema gifft dat bi Wikimedia Commons.