Florian Cenôwa

Florian Stanislaw Cenôwa (poolsch Florian Ceynowa; * 4. Mai 1817 in Slawoschin; † 26. März 1881 in Bukowitz) weer en kaschuubschen Schriever.

Cenôwa is 1817 as Söhn von’n Buurn un Dörpsmidd Wojciech un Magdalena Cenôwa (borene Pienczen) in Slawoschin boren. Na de Volksschool güng he von 1831 bet 1841 op’t Gymnasium in Konitz. He hett denn Philosophie studeert un siet 1842 Medizin an de Universität Breslau. In dat Wintersemester 1843 is he na Königsberg wesselt.

Dör Inwarken von’n Polen Ludwik Mieroslawski weer Cenôwa an’n 22./23. Februar 1846 bi en antidüütschen Opstand in Preußisch Stargard dorbi. An’n 6. März 1846 is he op de Flucht in Karthaus fastnahmen worrn. An’n 17. November 1847 hebbt se em in Moabit to’n Dood veroordeelt. Dör de Märzrevolutschoon 1848 hett de prüßische König em begnadigt un he is freekamen.

1851 hett he in Berlin sien Dokter in Medizin maakt. Na korte Tied aver hett he al en Beroopsverbaad kregen. He schall an sien eerste Arbeitssteed in Bukowitz bi en junge Fro sien Vertrauensverhältnis as Dokter utnützt hebben. Cenôwa hett denn as Buur leevt aver blangenbi ok noch wedder ünner de Hand as Dokter arbeidt. 1843 is siene eerste Kortgeschicht op Kaschuubsch un op Hoochdüütsch rutkamen, Die Germanisierung der Kaschuben.

Cenôwa weer de eerste, de överhaupt kaschuubsch schreven hett un is dorvon ok de Vader von de kaschuubsche Schriftspraak. He hett sik op de een Sied gegen de Germanisierung von de Kaschuben wennt, op de anner Sied aver ok gegen de Polonisierung.

Cenôwa is 1881 doodbleven un liggt op’n Karkhoff in Heinrichsdorf begraven.