Franz Löbert

Franz Willem Albert Löbert (* 6. Juni 1906 in Bremen; † 10. Juni 1975) weer en Bremer Politiker (SPD) un Senator.

Leven

Löbert hett as koopmännschen Anstellten bi de Lloyd-Dynamo-Warken arbeidt un weer Liddmaat vun de Gewerkschup ÖTV. Över de Wandervogel-Bewegung keem he 1927 to de SPD un is bi ehr intreden.

Vun 1945 bit 1947 weer Löbert Börgermeester vun den Oort Huchten in dat Land Bremen, as Huchten denn Deel vun de Stadt Bremen wurrn weer, is Löbert 1947/1948 Vörsitter vun dat Oortsamt in Huchten ween.

Vun’n 28. November 1967 af an is he as Binnensenator bi den Senat Koschnik I ween. Bremer Börgermeester un Präsident vun den Senat weer dormols to’n eersten Mol Hans Koschnick. 1969 hett Löbert tietwies ok de Geschäften föhrt as Bosenator. Löbert weer in’t Amt bit to’n 15. Dezember 1971.

Verheiraat weer he mit siene Fro Alma Löbert. In Huchten driggt de Franz-Löbert-Platz sien Naam.

Kiek ok bi

• Bremer Senat
• Senat Koschnick I (1967-1971)