Fred Saberhagen
Fred Thomas Saberhagen (* 18. Mai 1930 in Chicago; † 29. Juni 2007 in Albuquerque) weer en US-amerikaanschen Science-Fiction- un Fantasy-Schriever.
Leven un Wark
ännernSaberhagen hett bi de US Airforce un as Elektrotechniker arbeit. Sien eersten Publikatschonen weer Artikels in de Encyclopedia Britannica. Bekannt worrn is he 1961 mit eerste Kortgeschichten in Magazinen as „Galaxy“.
He is internatschonal bekannt worrn mit sien „Berserker“-Saga, en Reeg mit de he 1967 anfungen hett. Annere Roman-Regen vun Saberhagen weern to’n Bispeel de „Books of Swords“-Reeg, de dreedeelige „Empire of the East“-Reeg oder de „Dracula“-Romanen, in de de Romanfigur vun Bram Stoker ne’e Geschichten ok tosamen mit annere Figuren ut de Literatur, as Sherlock Holmes oder Merlin, beleevt.
In den eersten Roman ut de Reeg „The Dracula Tape“ (dt.: Die Geständnisse des Grafen Dracula) vun 1975, vertellt Saberhagen de Geschicht ut den Roman vun Bram Stoker ut de Sicht vun Dracula, för den de annern Figuren Harker, Van Helsing usw. blots en Koppel vun dösige Tüdelbüdels sünd.
Tosamen mit den Dreihbookschriever James V. Hart hett Saberhagen ok de Romanversion to Francis Ford Coppola sien Film „Bram Stoker’s Dracula“ ut dat Johr 1992 schreven.
