Frederick Soddy

Frederick Soddy (* 2. September 1877 in Eastbourne; † 22. September 1956 in Brighton) weer en engelsch Chemiker un Student von Ernest Rutherford.

Frederick Soddy in’t Johr 1922.

Soddy hett Chemie an’t College of Wales in Aberystwyth un an de Universität Oxford studeert. Dor hett he denn ok van 1898 bit 1900 arbeidt. Dornah hett he tosamen mit Rutherford an de Universität Montreal över Radioaktivität forscht. 1903 kunn he tosammen mit Sir William Ramsay nahwiesen, dat bi den Alpha-Verfall van Radium Helium entstaht. 1904 bis 1914 hett Soddy denn an de Universität Glasgow ünnerricht. In disse Tiet kunn he nahwiesen, dat de Atome van radioaktiv Elementen ünnerschedliche Massen hebben köönt ober de glieke chemische Egenschoppen. Dorför hett he 1913 de Begreep Isotop prägt. Later hett man denn faststellt, dat ok stabile Elemente ünnerschedliche Isotopen hebben könnt.

1914 is he nah Aberdeen wesselt und van 1919 bit 1936 hett he weer in Oxford arbeit.

Soddy hett 1921 de Nobelpries för Chemie kregen „för sien Bidrääg to de Kenntnis van de Chemie van de radioaktiven Stoffe un för sien Ünnersöken över dat Vörkamen un de Natuur van de Isotopen".