Friedrich Ernst Peters

Friedrich Ernst Peters (* 13. August 1890 in Luhnstedt; † 18. Februar 1962 in Sleswig) weer en Schoolmeester un Schriever vun hoochdüütsche Gedichten, Geschichten un Romaans un vun den plattdüütschen Roman „Baasdörper Krönk“.

Leven un Wark ännern

Peters sien Vadder weer Handwarker in sien Heimatdörp. He is Schoolmeester wurrn un weer an't Enne vun sien Arbeitsleven Direktor vun de Landsschool för Gehörlosen in Sleswig. He schreev an un for sik hoochdüütsch, man 1946 harr he in't Vörwoort vun sien Roman „Die dröge Trina“ schreven, dat he allens „extra för den Leser bi dat Schrieven in't Hoochdüütsche överdragen“ harr. He schreev ok plattdüütsche Gedichten. 1938 keem sien plattdüütschen Text „De Arbeit gifft den Takt an“ in den Eutiner Almanach rut. 1960 is sien Geschicht „So kemen wi na Huus“ to'n 60. Gebortsdag vun den Schriever in de Tietschrift Schleswig-Holstein rutkamen. Dor ünner stunn to lesen: „Ut dat letzt Kapitel vun'n plattdütschen Roman“.

Baasdörper Krönk ännern

Düsse Roman weer de „Baasdörper Krönk“. To Leevtiet hett Peters düssen Roman nich rutgahn laten. Dat Manuskript hett bi en Arvin överduert. Dat is woll versöcht wurrn, dat Wark to drucken, man keen Rutgever woll dat wagen, en plattdüütschen Roman rut to bringen un so is dor eerst mol nix vun wurrn. Man 1974 hett Ivo Braak dor in'n Noorddüütschen Rundfunk, in't Funkhuus Kiel ut vörleest. Dat weer en Akschoon in den Rahmen vun de Kieler Week. Sendt wurrn is dat denn an'n 29. Januar 1976. Dor hefft Wolfgang Lindow un Paulk Selk sik denn tohopendaan un dat denn ut de Nalatenschup rutgahn laten. Schreven hett Peters dat al in de 1930er Johren. Achter dat veerte Kapitel steiht in sien Manuskript: 2.3.32 un achter dat leste Kapitel steiht 22. Oktober 1932. He hett denn woll bi een Johr bruukt för den ganzen Roman. 1975 is dat Wark denn in Husum druckt wurrn. Een tweete Uplaag is 1986 rutkoom.

Born ännern

  • Wolfgang Lindow, Paul Selk: Nachwort, in: Peters, Baasdörper Krönk, Husum 1975

Böker vun Peters ännern

  • Baasdörper Krönk Romaan, 320 Sieten Husum 1975
  • Ausgewählte Werke 2 Bde. Rutgeven v. C. Jenssen, 1958
  • Gebild und Leben Een Utwohl, 302 Sieten, Schleswig 1955
  • Erzählungen 1950
  • Bangen und Zuversicht Gedichte, 116 Sieten, Göttingen 1947
  • Im Dienst der Form Sammelte Upsätz, 276 Sieten, Göttingen 1947
  • Die dröge Trina Geschicht vun een "Poahr Dangoaß", 176 Sieten, Göttingen 1946
  • Blaise Pascal 1946
  • Zwiegesang seliger Geister Vertelln, 110 Sieten, Göttingen 1944
  • Kleine Erzählungen Vertelln, 60 Sieten, Göttingen 1941
  • Die schmale Brücke Vertelln, 1941
  • Preis der guten Mächte Besinnung und Erinnerung, 190 Sieten, Göttingen 1940
  • Zweierlei Gnaden Gedichte, 100 Seiten, Göttingen 1940
  • Der heilsame Umweg Romaan, 278 Sieten, Göttingen 1938
  • Licht zwischen zwei Dunkeln Gedichte, 68 Sieten, Göttingen 1938
  • Totenmasken Gedichte, 34 Sieten, Göttingen 1934

Weblenken ännern