Fritz Broistedt

Fritz Broistedt (* 26. Februar 1893 in Meine; † 7. August 1972 in Winsen) weer en düütschen Politiker von de DP un de CDU.

Broistedt is 1893 in Meine boren un weer op dat Gymnasium Martino-Katharineum in Bruunswiek. He hett denn Bueree an de Universität Göttingen studeert un dor 1925 sien Dokter maakt. Von 1914 bet 1918 weer he in’n Eersten Weltkrieg Soldaat bi de Marien. Toeerst von 22. September 1914 bet März 1917 in de IV. Matrosenartillerieabteilung un denn von März 1917 bet Kriegsenn in dat I. Bataillon 2. Matrosenartillerieregiment. Broistedt weer Vizefeuerwerker der Reserve un later Leutnant der Reserve bi de Matrosenartillerie (na en Meldung von’n 13. Juli 1916).

Na’n Krieg hett Broistedt to de Christlich-Natschonale Buern- un Landvolkpartei tohöört. Von 1921 bet 1935 weer he Geschäftsföhrer von’n Landbund. He weer von 1922 bet 1934 Maat in’n Bueree-Vereen Winsen un is dor 1929 Vörsitter worrn. In Winsen weer he sied 1925 ok Maat in’n Huus- un Grundbesitter-Vereen. 1929 is he Maat in’n Volksbund för dat Düütschdom in’t Butenland worrn. Al vör 1933 weer he Maat bi’n DRK worrn. Von 1931 bet 1935 weer he Maat in’n Stahlhelm, Bund von de Frontsoldaten (toletzt as Kreisföhrer). Von 1933 bet 1935 weer he Stabsleiter bi de Kreisbuernschop. Von 1934 af an weer he Maat in de NSV, 1936 in’n NS-Marinebund, 1938 in’n NS-Rechtswohrerbund un 1940 in’n Rieksluftschutzbund (toletzt as Kreisgruppenföhrer). An’n 1. Mai 1937 is he in de NSDAP ringahn (Matennummer 5.767.313).

Von 1940 bet 1945 weer Broistedt in’n Tweten Weltkrieg Soldat bi de Kriegsmarien (toletzt in’n Rang von en Korvettenkoptein). 1944 weer he Sakenbearbeider bi dat Wehrbezirkskommando Lümborg (na en Meldung von’n 1. März 1944).

An’n 29. März 1947 is Broistedt as nominellen Nazi-Ünnerstütter in Kategorie IV (Mitlöper) entnazifizeert worrn. In en Beropungsverfohren is dat an’n 7. Oktober 1948 in Kategorie V (Nich belast) ännert worrn.

Na’n Krieg hebbt de Briten em in Winsen ünner dat Leid von Major Alan Seddon as British Resident Officer an’n 19. November 1945 as Viez-Vörsteher, von 1946 af an as Viez-Börgermeester von de Gemeen Winsen insett. 1947 bet 1950 weer he Geschäftsföhrer von dat Neddersassische Landvolk. 1948 bet 1952 un wedder von 1956 bet 1971 weer he Börgermeester von Winsen. 1952 is he Landraad von’n Landkreis Horborg un Liddmaat in de Düütschen Partei (DP) worrn.

Broistedt weer von’n 6. Mai 1951 bet 5. Mai 1959 as Maat von de DP/CDU-Frakschoon Afornten von de 2. un 3. Wahlperiood in’n Landdag von Neddersassen. Von’n 5. Juni 1951 bet 5. Mai 1955 weer he Maat in’n Ingavenutschuss, von’n 14. Juni 1955 bet 4. Dezember 1957 in’n Utschuss för Rechts- un Verfatensfragen un von’n 4. Dezember 1957 bet 5. Mai 1959 in’n Utschuss för Hoogseefischeree. 1959 is he von de DP na de CDU wesselt. Nadem he 1971 dat Amt as Börgermeester in Winsen afgeven hett, is he Ehrenbörger von de Stadt Winsen worrn. He is op’n Waldkarkhoff in Winsen begraven.

2012 hett dat in’n Stadtraad von Winsen en Andrag geven, dat Broistedt sien Ehrenbörgerschop wedder afkennt warrn schall, vonwegen dat he in en Reeg NS-Organisatschonen weer. Düsse Andrag is von’n Stadtraad aflehnt worrn.