Fulwar Skipwith (* 21. Februar 1765 in Dinwiddie County; † 7. Januar 1839 in Baton Rouge) weer en amerikaanschen Politiker un Staatspräsident vun West-Florida.

Fulwar Skipwith

Skipwith is 1765 in Dinwiddie County in Virginia as Söhn vun Fulwar Skipwith Senior un Martha Waldron boren un weer Schöler op dat Willems-un-Marien-College in Williamsburg. In en Öller vun 16 Johr is he aver vun de School af un hett sik in’n Amerikaanschen Unafhängigkeitskrieg freewillig mellt. He weer ünner annern 1781 bi de Slacht vun Yorktown mit bi.

1791 bet 1795 weer he Deel vun de amerikaansche Baadschopsafordnung in Frankriek ünner Baadschopper James Monroe. Monroe möök em 1795 denn to’n Generalkonsul in Paris. 1802 dee Skipwith de fläämsche Baroonsch Thereze Josephine van den Clooster freen. Ok dat de USA 1803 Frankriek Louisiana afköpen deen, dor hett he veel an mitwarkt.

1809 güng Skipwith na Spaansch-Florida un weer 1810 bi de Rebellion gegen Spanien mit bi, in de sik West-Florida as egen Staat utropen dee. Skipwith övernehm dat Amt as Präsident un weer vun’n 23. September af an de eerste un eenzige Staatsbaas vun West-Florida, denn an’n 27. Oktober al dee de US-Präsident James Madison den Staat annekteren. Se menen, mit’n Koop vun Louisiana harrn se ok Rechten op West-Florida övernahmen. Skipwith weer dor gegen un harr eenmal sogor seggt, dat he praat is, för de Flagg vun West-Florida sien Leven to laten. Aver dat weer man mehr Snack, denn he weer doch bereit, över dat Bitreden vun West-Florida to de USA to verhanneln. Aver ok dor is nix vun worrn, em bleev ameen doch nix över, as de Annexion dör de USA eenfach so hentonehmen. In’n Dezember 1810 hebbt se de letzten Posten vun West-Florida an de USA övergeven.

Skipwith is denn in’n Senat vun Louisiana wählt worrn.