Gaetano Arfé
Gaetano Arfé (* 12. November 1925 in Somma Vesuviana; † 13. September 2007 in Neapel) weer en italieenschen Politiker, Historiker un Journalist.
Arfé güng 1944 in’n italieenschen Wedderstand un hett dor bi de Partisanengrupp Giustizia e Libertà mitmaakt. 1945 is he de Sozialistische Partei vun Italien bitreden. He hett 1948 sien Afsluss an de Universität Neapel in Philosophie un Öllerdomswetenschop maakt. 1965 warrt he Perfesser för jüngere Geschicht an de Universitäten Bari un Salerno. Vun 1959 bet 1971 hett he dat Blatt Mondo Operaio mit rutgeven un 1966 bet 1976 dat Parteiblatt Avanti! rutgeven. An’n 2. April 1975 geev dat en Anslag op Arfé, de sien Huus in Schutt leggt hett un bi den dree Personen wat afkregen hebbt. Binnen de Partei weer he vun 1957 bet 1982 in dat Zentralkomitee un weer vun 1979 af an bet 1984 in dat Europaparlament (Frakschoon vun de Sozialdemokraatsche Partei vun Europa). Dor hett he sik vör allen ok för dat Schulen vun Minnerheitenspraken insett un twee Beslüss dörbröcht, Arfé I 1981 un Arfé II 1983. He hett dormit ok de Grundlaag för dat Europääsche Büro för minner bruukt Spraken leggt.
1984 is he ut de Sozialistische Partei rutgahn un weer 1987 as Unafhängigen över de List vun de Kommunistische Partei vun Italien in’n Senat. Arfé is in’n September 2007 in Neapel vun Adenversagen doodbleven.
Literatur
ännern- Ciro Raia: Gaetano Arfé. Un socialista del mio Paese. Manduria-Bari, 2003